German champion leh champion lai Bayern Munich Vs Real Madrid

UEFA Champions League quarterfinal inkhel tur zinga hmuhnawm ber tura ngaih Bayern Munich leh Real Madrid te chuan zanin dar 12:15 hian Allianz Arena-ah first leg an khel dawn.

Club hlui hmaah

Bayern manager Carlo Ancelotti hian kum 2013-2015 inkar khan Real Madrid hi a enkawl a, tuna Los Blancos boss Zinedine Zidane hi a thachhang dawltu a ni. Italian manager hi Spanish club Champions League nomawi vawi 10-na chawipuitu a nih avangin Real

ṭantute thinlungah Ancelotti hian hmun pawimawh tak a chang ngei ang.

Bayern boss Ancelotti chuan, "Kan tan chuan match pawimawh bik a ni. Tun season-ah inrintawkna nasa tak kan nei a, Champions League nomawi chawi ngei hi kan duh a ni. Real Madrid hneh thei turin theihna kan nei a, kan hma­chhawn tur hi team ṭha tak coach ṭha tak hnuaia khel an ni," tiin a club hlui hneh a tum thu a sawi.

Ancelotti ang thoin Bayern midfielder Xabi Alonso-a'n Real-ah hmun pawimawh tak a chang a, Spanish midfielder hian Los Blancos hi league match ringawt pawh vawi 158 zet a khelh sak thei a, chutihrual­in Real Sociedad leh Liverpool FC tana a khelh laiin Spanish club lamah hian a goal a khung ve ve thung.

Hetihlai hian Real Madrid midfielder Toni Kroos chu Bayern Munich aṭang-

a inzir chhuak a ni thung. German midfielder hian Champions League-a Bayern jersey a hak hnuhnun ber chu Real a hmachhawn ṭumin a ni a, kum thum liam ta daih tawh kha a ni. Kroos chuan, "Ka khelhpui ṭhahnem tak an awm a, ram tana ka khelhpui an awm nual bawk. Bayern chanchin hi ka theih chin chinah ka ngaihtuah a, he club-a ka hun tawn hi ka career-a hun pawimawh tak a ni," tiin a sawi ve bawk.

Inkhel lo tur?

Bayern Munich-in an defender pawimawh Mats Hummels chu ngalrek hliam vangin an chhawr thei dawn lo a, ngalrek hliam vang thoin Thomas Muller dinhmun a chiang lo. Defender Jerome Boateng chuan yellow card a hmuh chuan Santiago Beranbeu-a second leg an khelh hunah a inlan thei lo ang.

Real Madrid-in defender pahnih Pepe leh Raphael Varane te inhliam vangin an chhawr thei dawn lo a, Sergio Ramos leh Luka Modric te chu yellow card hmuh palha second leg khel thei lo tur an ni bawk.

Ronaldo a chuai

Cristiano Ronaldo hi player ropui a ni a, sulhnu nei ṭhain tunah pawh la ṭha reng mah se Real Madrid rinrawl ber ni tur khawpin a ṭha tawk em tih hi zawhna awm thei a ni. Zinedine Zidane-a hote hi Madrid Derby-ah Atletico Madrid nen 1-1 in an inhnehtawk a, Ronaldo khelh danah Los Blancos ṭantu tan lawm lohna tur a tam tawh zawk - Real ropuina belhchhahtu hian tunah chuan Real ropui leh zelna tur a dal tawh niin a lang.

Portugal captain Ronaldo hian season thum chhungin La Liga-ah Lionel Messi aiin an khung tam vek a, tun season-ah erawh Barcelona thiampuipa hian goal 27 a khung tawh laiin Ronaldo hian goal 19 chiah a la khung a, kum 32 a tlin tawh bawk avangin chuai lam a hnaih. Chutihrualin Ronaldo hi mi bik a ni a, Bayern Munich hmaah match pawimawhah eng ang chiaha ṭangkai nge a nih tih fiahin a awm dawn.