World Cup 2026 USA, Canada & Mexico-in thlen ṭawm dil

United States of America, Canada leh Mexico te chuan kum 2026 FIFA World Cup inthlen ṭawm an dil tur thu an puang. Kum 2026 hi World Cup-a tel ṭhin ram 32 aṭanga 48-a tihpun a nih hnua World Cup hmasa ber a ni dawn a, USA, Canada & Mexico dilna hi a hlawhtling a nih chuan ram pathumin World Cup an inthlen ṭawm hmasak ber a ni bawk ang.

Ram pathumin World Cup thlen an dilna ang chuan USA hian match 60 an thleng ang a, Canada leh Mexico-in match 10 ve ve an thleng bawk ang. Kum 2026 World Cup thlengtu tur hi May 2017-ah ngaihtuah tura tih hmasak zet ni mah se 2018 leh 2022 World Cup Russia leh Qatar-in an thlen tur chungchangah thamna sum a awm nia hriat chhui a nih avangin kum 2020 atan sawn a ni.

USA hian kum 1994 khan World Cup a lo thleng tawh a, he inelna chanchina a hmuna entu an tam ber ṭum record an siam. Mexico hi World Cup vawi hnih thleng thei hmasa ber an ni thung a, kum 1970 leh 1986 khan an lo thleng tawh. Canada hian kum 2015 Women's World Cup an thleng thung.

Nikuma USA president ni tura thlan tlin Donald Trump-a'n a campaign au hlaah Mexico nen an inrina ramriah bang siam a tum thu sawi mah se US Soccer Federation president Sunil Gulati chuan Trump chuan an dilna chu a thlawp thu a sawi.

Kum 2026 World Cup thleng tur hian Europe leh Asia khawmualpui chhunga ram te chuan an dil thei lo a, hei hi FIFA-in khawmualpuiin World Cup inthlen chhawk dan kalphung a neih vang a ni.