Amritpal inlan tàwp zan?
Mizoram Super League Season 3-ah Zarkawt BCA an la chak vek a, zanin dar 8:00 hian Chanmari Hollow te an inhmachhawn dawn.
BCA chakna hnar feet ruk leh inches 11-a sang Amritpal Singh leh veteran player Yadwinder Singh te tan zanin hi MSL3-a an match hnuhnung a nih theih avangin an khel en duh leh la en châk tan Hawla Indoor Stadium pan mai tur a ni.
Engtin maw?
Amritpal leh Yadu ten MSL3 hmuhnawmna belhchhah turin Aizawl an rawn pan a, season tawp an khar pui theih si loh chuan anmahni chhawrtu BCA tan channa nasa tak a ni ang. India player ṭha pahnih hian Hollow an hmachhawn zawh hian Australia-ah club khelhna zawngin Tuikual South center Amjyot Singh Gill leh Khatla TBL guard Vishesh Bhriguvanshi te nen an zin ang.
Trial neih hun chhung hi ni hnih awh chauh ni mah se India national team-in June thla hian Malayasia-ah tournament an khel dawn. Hemi inpuahchahna atana camp ṭan hma a nih chuan India player ṭha-te hi MSL-ah an inlan a rinawm tawh lo.
MSL semifinal game hmasa ber hi May 4-ah khelh ṭan tur a ni a, final hi game hmasa ber hi May 16-ah khelh a ni ang.
Chak duh ve ve
BCA coach Lalruatfela chuan, "Table hmahruaitu nih kan duh a, chumi tur chuan Hollow lakah hian kan ṭhat dan berin kan khel ang. Amritpal leh Yadu te pawhin hun pawimawh an chang ang a, Mizo player inhliam erawh kan chhawr lui lo ang," tiin chak an tum thu Vanglaini palai a hrilh.
Hollow coach Samuel Lalthlamuana chuan, "Kan match hnuhnung bera kan chak lohna lai freethrow bik chu kan siam-ṭhat theih kan ring a, Mohit Bhadu-a'n a theihna anga a khelh theih bawk chuan hmahruaitu BCA hi hnehna kan chan theih ka ring," tiin Khatla TBL an hneh loh hnuah a insiamṭhat tawh thu a sawi.
Zarkawt BCA leh Chanmari Hollow enkawltuten anmahni ṭantute inkhel en turin an sawm a, ṭantu an neih ṭhat bawk avangin Hawla Indoor Stadium khat tlat an pungkhawm ngei rin a ni.
# TEAM Pld W L Pts GF GA GD
1 Zarkawt BCA 3 3 0 6 225 195 30
2 Tuikual South BC 3 2 1 5 260 231 29
3 Khatla TBL 3 2 1 5 200 198 2
4 Chanmari Hollows 3 1 2 4 215 223 -8
5 Mission Veng Vikings 2 0 2 2 124 137 -13
6 Zarkawt Serpents 2 0 2 2 126 166 -40