Argentina-in coach an ban

World champion vawi hnih ni tawh Argentina chuan an manager Edgardo Bauza-a'n match riat chauh a naute a kaihruai hman tihah an ban.

Argentina hian tun hnaiah result ṭha an nei hlei thei lo. South America aṭanga World Cup khelh tuma inel ram 10 zingah pangana an ni mek. Palina chin chiah Russia pan turin an tling nghal dawn a, pangana hian playoff an khelh a ngai dawn a ni.

Kum 59-a upa Bauza hi nikum August thla khan an ram team enkawl tur hian ruat a ni a, vawi thum hnehna chan puiin ṭum thum tho a chak loh pui - vawi hnih dang chu an khingpuite nen an inhnehtawk. An result a ṭhat tawk loh avang hian FIFA ranking-a pakhatna an nihna pawh Brazil lakah an chan.

Argentina Football Association president Claudio Tapia chuan, "Bauza hi national team a enkawl tawh loh tur thu kan hrilh. Kan ram team hian result ṭha kan nei lo a, hei hi mi zawng zawng hriat a ni," a ti.

Argentina hian World Cup qualifying match khelh hmabak pali an la nei, a hmasa ber atan August 31 khian an chunga awm Uruguay an hmachhawn ang. Argentina-in World Cup an khelh phak loh hnuhnung ber chu kum 1970 daih tawh kha a ni.