Granada coach thar Tony Adams

Arsenal legend Tony Adams chuan tun season tawp thleng atan Granada a enkawl dawn. Gunners leh England captain hlui hna hi a awlsam dawn lo, a club enkawl tur hi La Liga table-ah a mawng ber dawt nilai an ni.

Kum 50-a upa Adams hi karhmasa lawk khan Granada-ah hian sporting director atan lakluh a ni a, kartawpa Valencia 3-1 a an hneh loh hnuah manager Lucas Alcaraz ban a nih avangin team enkawl hna hi a thawk zui nghal dawn.

Adams hian team enkawl chungchangah sulhnu a nei ropui hran lo, a enkawl hmasak ber chu Wycombe Wanderers niin League Two club hi mimal harsatna vangin a chhuahsan a, hemi hnuah Portsmouth enkawlin kum khat bak hun a hmang hman lo tihah ban a ni.

Kum 2010-11 season khan Gabala a enkawl leh a, mimal buaina vang bawkin Azerbaijan club hi a chhuahsan leh. Club a enkawl hnuhnung ber aṭanga kum ruk hnuah team talbuai mek a enkawl dawn tihna a ni.

Spanish club Granada hian tun season-ah manager pathum an neihna a ni satliah mai lo a, tun hnai kum thum chhungin manager pasarih zet an nei tawh!

Adams chuan, "Kan thil tum pui ber tur chu Granada hi Granada nih tir a ni ang. Club pumpuiah hian player 106 ka rochung a, heng zinga 44 chauh hi Granada mi leh sa an ni. Granada tana theihtawp chhuah tur player ka duh a, hun harsa karah pawh he club tana ding ngam tur mi kan mamawh ang," tiin a sawi.

Tun season La Liga match 31 khelh tawh aṭangin Granada hian point 20 hmuin an hnuaiah hian point 17 nei Osasuna chiah an awm. Relagate lo tur chin chiaha awm mek Leganese an phak lohna chu point sarih a nih avangin Adams tan chuan ngaihtuahna hman uluk a ngai khawp ang.

Tinge Adams?

April 14, 1931 a din Granada hi tunah chuan Chinese sumdawng hausa Jiang Lizhang-a ta a ni. Jiang Lizhang hi NBA basketball team Minnesota Timberwolves neitu zinga pakhat a ni bawk.

Adams hi Jiang Lizhang's DDMC Football Club Management Company-ah vice president a ni a, nikum khan Adams hian Chinese Super League-ah sporting director hna a lo thawk tawh.

China a chhuahsan hnuah Adams hian Spain a pan a, Jiang Lizhang hnuaiah a hna ngai a chelh chhunzawm. Manager ṭanglai Alcaraz ban a nih hnuah hmun dang melh buai loin club neitu nena inhre ṭha sa Adams hi hna pek belh a ni ta a ni.