Bangalore aiin Punjab an lian

Thawhṭanni zan khan Indore khawpuiah Royal Challengers Bangalore leh Kings XI Punjab an inhmachhawn a, wicket riat ngawtin RCB an tlawm.

Virat Kohli inhliam vanga Bangalore captain dinhmun luahtu Shane Watson-a’n thutlukna a siam sual a, Chris Gayle hahdamtir in opener ni turin a lut. Mahse, Australia captain ṭhin hian run khat chiah a siam hman tihin a out a, a dinpui Vishnu Vinod chuan run sarih bak a siam hman bik lo.

RCB mualpho tur venghim turin AB de Villiers a lo ding chhuak a, ball 46-a hmachhawnah run 89 siamin a tawp thleng a dam - mah se, South African batsman hian thlawptu a neih ṭhat tawk loh miau avangin over 20-ah RCB-in run 148 chian an siam a, wicket li an hloh.

Kings XI Punjab bat hun a thleng a, opener Manan Vohra (34 runs) leh Axar Patel (9 runs) ten beisei phak lo mah se Hashim Amla leh Glen Maxwell-ten an thiam thil ‘show’ na remchangah an hmang - Amla hian run 58 siamin a tawp thleng a dam a, captain Maxwell-a’n run 43 siamin a tawp thleng a dam bawk.

Punjab-in over 14.3 lekah an target an umpha vek a, wicket hnih chiah hlohin hnehna an chang. RCB captain Watson-a’n, “Ka bat hmasa ber a, run khat bak siam loa ka out avangin kan chak loh chhanah mawhphurtu an awm a nih chuan keimah ka ni,” tiin sawi mah se awmzia a nei tawh lo.

Zanin dar 8:00-ah IPL inkhel a awm lehnghal dawn a, Mumbai Indian chuan Wankhede Stadium-ah Sunrisers Hyderabad an mikhual ang.