Adebayor a la chuai lo

Arsenal striker hlui Emmanuel Adebayor chuan a thiam a la theinghilh lo tih Turkey lamah a pholang chhun­zawm zel a, Turkish Super Lig-a a club khelhna Istanbul Basaksehir-in Gala­tasaray 4-0 ngawta an sawpna inkhelah hatttrick a siam.

Tottenham Hotspur tan pawha khel tawh striker hian first half-ah goal hnih a khung a, minute 57-naah a lungthu kim nan a khung leh bawk. Istanbul goal khat dang hi Turkish striker Mustafa Pektemek khung a ni.

Adebayor-a'n hattrick a siam hnuhnung ber chu kum 2011 daih khan a ni tawh a, Real Madrid-a loan hmanga a khelh lai a ni. Kum 33-a upa striker hian January khan free agent nichungin Istanbul hi a zawm a, Turkish club tan hian goal nga a khung tling tawh.

Super Lig-ah Europe-a club langsar ni phak Galatasaray-in beisei an phak lo chhunzawm zel a, league match sarih chiah khelh tur awm tawhah palina dinhmun luah mekin pathumna Fenerbahce chu point khatin an phak lo mek.

Turkey coach hlui Abdullah Avci en­kawl Istanbul erawh hma­hruaitu Besiktas nena an inkar an sawr zim zel a, match sarih khelh tur awmah Chelsea player hlui Ricardo Quaresma leh Demba Ba khelhna club hi point nga chauha an phak loh tawh avangin champion turin beiseina thar an nei leh tawh.