Inkhel turin Murray a dam

World number 1 Andy Murray chu a kiu na vanga hun engawmaw tichhung a inkhelh theih loh hnuah court chhungah a lo kir leh thei tawh. Thawhṭanni zan khan Murray leh Roger Federer ten charity exhibition match Zurich, Switzerland-ah khelin kum 35-a upa Federer hian 6-3, 7-6 (7-5) in hnehna a chang.

Kum 29-a upa Murray hi March thla tira BNP Paribas Open-a a chak loh hnuah a inkhelh leh hmasak ber a ni. Miami Open a khelh theih loh hnuah karleha khelh tur Monte Carlo Masters-ah erawh harsatna dang a awm a nih loh chuan inkhel thei tawh tura ngaih a ni.

Britain tlangval Murray chuan, "Ka hliam a dam chho zel a, beisei ang chuan Monte Carlo-ah ka inlan thei ang. Inkhelh duhin phur viau mah ila a chang chuan chawlh kan mamawh ṭhin, min enkawltute ka ngaichang leh phawt dawn a, a ṭul a nih chuan dawhthei taki­n tournament dang ka nghak zawk mai tur a ni," tiin a sawi.