Big Jack - Irish-te ngainat England football hero

England-in an hmelma West Germany hnehin kum 1966 khan FIFA World Cup-ah an champion a, hemi ṭuma captain Bobby Moore dinpui chu Jack Charlton a ni. Leeds United legend Jack hian football khelh a chawlhsan hnuin 1990 World Cup-ah Republic of Ireland enkawlin quarterfinal a thlenpui a, Dublin khawpuiah mi 500,000 zetin an hmuak - a ropui dan hi thua sawifiah chi a ni lo.

Feet ruk leh inches 1.5-a sang Jack Charlton hi a palen avangin Big Jack tih a ni a, khawvel huap angin a nau Bobby Charlton-a'n hliahkhuh mah se hlawhtling taka Ireland a enkawl avangin English mi zinga Irish-te ngainat ber tia sawi a ni.

England football hero leh Irish te ngainat Jack Charlton chu kum 85 mi niin July 10, Zirtawpni khan cancer vangin a thi a, kum upat lamah rilru kim lohna (dementia) a nei tel bawk. Jack-a chhungte chuan, "July 10, Zirtawpni khan Jack hi kum 85 mi niin hahdam takin a chenna Northumberland-ah a chhungte awmpuina hnuaiah a thi. Amah hi mi tam takte ṭhian a ni a, chhungkaw tan pasal, pa leh pu ṭha tak a ni.

A damchhung hun ṭha taka a hmang hi kan chhuang a, mi ṭhahnem tak tana hlimna a siamsak avanga kan lawmna hi thuin kan sawifiah zo lo. Pa ṭha tak, kawm nuam leh fel tak a ni a, midang tan hun a insiam thiam hle. A hmunruak zau tak hi hnawhkhah theih a ni dawn lo a, chutihrualin kan nunah hriat reng tlak hlimna a thlen avangin kan lawm hle a ni," tiin thuchhuah an siam.

Ashington, Northumberland-ah Jack Charlton hi May 8, 1935 khan a piang a, an chenna khua hi lungalhthei khur awmna hmun a nih avangin a pa Bob pawh lungalhthei khura thawk a ni. A pa hian football tuipui lo mah se a nu hi football chhungkua aṭanga seilian a ni a, football khelhtir a thlawp thung.

Newcastle United leh England legend Jackie Milburn pawh kha Jack-a nu unaupa (cousin) a ni a; an chhungte zingah top flight football khelpha Jack Milburn, George Milburn, Jim Milburn leh Stan Milburn te an awm bawk. Jack hi kum 15 a nihin Leeds United-a trial turin sawm a ni a, amaherawhchu a pa hnung zuia lungalhthei khura thawh a thlang.

Lungalhthei khura hnathawh hautakzia a hriatin Jack-a'n rilru a thlak a, Police zawm a tum bakah Leeds United sawmna a ngaihtuah ṭha leh bawk. Police-a interview hun leh Leeds-a trial hun a inrual avangin football khelh a thlang ta zawk a, khawvelin a hriat phah ta bawk.

Jack Charlton-a'n Leeds Unitd hotute tilawm turin hun rei a mamawh lo a, a len ṭhat bawk avangin kum 16 a nihin youth team aṭangin reserve team-ah dah chhoh a ni a. Kum 17 a nihin manager Raich Carter chuan professional contract a ziahpui a, April 25, 1953-ah club tana a match hmasa ber a khel.

Leeds United tana a khelhtir lam hian kum hnih chhung ram tan sipai hna thawh a ngaih avangin 1954–55 season-ah phei chuan vawi khat chauh a inlan. Sipaia a hun hman tur a hman zawh hnuah erawh Leeds-ah letin hmun pawimawh a chang chho leh thuai a, club pawh Second Division aṭangin First Division-ah a hlankaipui.

Kum 1961-ah Don Revie-a'n Leeds United a enkawl ṭan a, manager thar hian Jack hi attacking puia a tlanchhuah tam avangtein a khelhdan hmang a duh lo. Revie hian Leeds a zawm hmain Jack hnenah Elland Road-ah a kal a nih chuan a chhawr loh tur thu a sawi a, a zawm tak bawk si avangin kum 1962 khan Jack-a'n contract a pawtsei duh ta lo.

Liverpool leh Manchester United an rawn lang vat a, Jack-a tan a nau Bobby nena khelh dun theihna hun remchang a inhawng bawk. Jack hi manager Matt Busby nen inhmu hman hial mah se United boss hian centre back dang a zawn avangin inremna a siam lawk duh lo. Hemi a nih avang hian Jack hi a lungawi lo a, Revie bulah kalin contract thar ziah a duh thu a hrilh.

Revie pawhin Jack hi lo pawm thlapin Leeds United-ah kum 11 dang a khel a, Norman Hunter nen tlarhnungah inkawpin vanglai hun an chen. Leeds hian 1967–68 season-ah League Cup-ah an champion a, 1968–69 season-ah First Division-ah  champion lehin 1971–72 season-ah FA Cup-ah an champion. Heng bakah hian Inter-Cities Fairs Cup-ah 1967–68 leh 1970–71 season khan an champion bawk. Jack hian Leeds United tan a hun pum a hmang a, English club tan hian vawi 773 zet a inlan.

England tan Bobby Charlton-a'n hmun pawimawh a chang a, 1958 World Cup-ah pawh Three Lion squad-ah a tel pha tawh. Hetihlai hian a u Jack erawh kum 30 mi a nihin manager Alf Ramsey-a'n a ko ve chauh. 

Big Jack-a'n England tana a khelh hmasak ber chu April 10, 1965-ah a ni a, Scotland nen 2-2 in an inhnehtawk. Hemi ṭum hian Jack hin a nau Bobby goal khung tur a siamsak. Ramsey hian Jack hi a duhna chhan chu player fing leh thiam Bobby Moore thlawp turin a ni a, ball kangah a lenna chu hman ṭangkai a duh bawk.

Kum 30 chauhin England tan khel 

ṭan mah se Jack hian vawi 35 zet ram tan a khel hman a, 1966-a England-in an ram ngeia World Cup an champion ṭumin player pawimawh a ni pha. Jack hi Mexico-a neih 1970 World Cup-ah pawh a tel a, mahse Ramsey-a'n Brian Labone a rin tak avangin khelhna a chang tam ta lo.

England pana an hawnaah Jack chuan, "Hun hlimawm tak kan hmang ho a, tunah erawh kan upa ṭan a, tha pawh a ṭhum ṭan a, ka awl a hun ve ta," tiin Ramsey a hrilh a, England manager chuan, "Ni e, keipawhin ka pawm e," tiin a lo chhang. 

Jack Charlton hian kum 38 a nihin Second Division club Middlesbrough aṭangin manager atana sawmna a dawng a, interview hmachhawn duh loin amaha an beisei a zawt thung. Boro hi contract ziak loin a enkawl a, kum khatah £10,000 a hlawh. 

Boro chairman hian hei aia tam pek inhuam mah se thil dang duh a nei zawk. Jack hian ban a duh lo a, club a enkawlnaah board inrawlh a duh lo a, kar khatah sangha man leh ram vak turin ni thum chawlh a beisei bawk. Jack hian Middlesbrough hi season khatanaah Second Division-ah a champion pui nghal a, 1973–74 season hian manager of the year a thlan a ni.

Kum 1977 thleng Jack hian Middlesbrough a enkawl a, Don Revie-a'n England coach hna a chawlhsan khan an ram team enkawl a dila chhanna a hmu lo. Boro hnuah Jack hian Sheffield Wednesday leh Newcastle United a enkawl a, a hming chherna ber erawh Republic of Ireland-ah a ni.

Liverpool leh Republic of Ireland player hlui Mark Lawrenson chuan, 'Ireland pathian' ti hialin Jack Charlton hi a sawi a, BBC sport pundit hnathawktu hian uar taka amah enkawl tawhtu a fak hi a mak hran lo. Jack hian December 1985 khan Football Association of Ireland nen inremna an siam a, Republic of Ireland enkawl hna a ṭan. May 1986-ah Iceland leh  Czechoslovakia te nen Iceland Triangular Tournament an khel a, Ireland hi pakhatna a nihpui.

Khelmual chhungah Jack-a khelhtir duh dan hi football ngainatute hmuhnawm tihzawng a ni lo a, 4-4-2 formation hmangin long ball a vawrh nasa a, an goal bawh a na hran lo. Chutihrualin an khingpui defender-te an chetsual theih nan pressure an pe nasa thung.

Jack-a hnuaiah Ireland-in khelh dan phung nghet an nei a, Euro 88 khel turin  Belgium, Bulgaria, Luxembourg leh Scotland te awmna group aṭangin an tling. Irish mi ni lo Ireland team enkawl hmasa ber a ni a, major tournament hmasa ber a khelhpui. Inelna ṭan hmaa champion rinkai England chu match hmasa berah a hmachhawn a, amah hnawl tawhtu Three Lions lakah 1-0 in hnehna a chang. Jack hian a game plan hmangin English winger ṭha pahnih Chris Waddle leh John Barnes te a dah ṭha a, Ireland chanchina hnehna pawimawh ber zinga mi a ni.

Euro 88-ah hian Soviet Union nen an inhnehtawk zui a, match tawp berah champion zui ta Netherlands 1-0 chauha an hneh loh avangin group stage an paltlang ta lo. Ireland hian Jack-a kaihhruainain kum 1990 khan a vawi khat nan World Cup khel turin an tling a; England, Netherlands leh Egypt te nen group khata an awm chungin group stage an paltlang. Round of 16-ah Ireland-in Romania penalty hmangin an hneh a, quarterfinal lut turin hun pangngaiah chak an nei lo a, chak lo pawh an nei chuang loin an khingpui nen an inhnehtawk vek.

Quarterfinal-ah erawh Ireland hi a thlengtu Italy lakah an vanduai a,  Roberto Donadoni ball pet kawh zet chu keeper Packie Bonner-a'n a dan per avangin goal ruakah Salvatore Schillaci-a'n goal awmchhun a khung. Ireland hian World Cup a khelh hmasak berah quarterfinal an thleng a, Dublin-ah mipui 500,000 zetin pasalṭha hmuahin an hmuak. Jack-a hian Ireland hi 1994 World Cup a khelhpui leh a, Euro 96 erawh a thlenpui zo ta lo. Euro Qualifying round-ah pahnihna an ni a, playoff-ah Netherlands 2-0 a an hneh loh hnuin coach hna a chawlhsan. Ireland hian Jack Charlton-a hnathawh hi an ngai hlu a, kum 1996 khan Irish khua leh tui nihna an pe.