Man City-in Burnley an sawp

Manchester City-in Inrinni zan khan Burnley 5-0 in an sawp a, Riyad Mahrez-a'n hattrick a siam. Etihad Stadium-a inkhelah hian Benjamin Mendy leh Ferran Torres ten goal khat ve ve an khung bawk. 

Premier League-ah Pep Guardiola hote hi champion rinkai an ni a, mahse season bul an ṭan ṭhat loh avangin an theihnaah rinhlelhna a awm. Clarets laka an khelh danah erawh Man City-in theihna an neihsanzia a lang a, match khata an khelh tlem bawk avangin champion tura rinkai zinga mi la tih theih an ni.

Manchester City-in bul an ṭan ṭha a, minute rukna lekah Kevin De Bruyne pass chu Riyad Mahrez-a'n a hlai goal. Algerian forward hian minute 22-naah a khung leh a, Kyle Walker-a'n rang taka throw-in a neih vang a tih theih.

Mualneitu tan De Bruyne a hmuhnawm a, inkhelh an thununna kawngah a ṭangkai hle. Belgian mid-fielder hian minute 41-naah Benjamin Mendy goal khung tur a siamsak a, French defender hian English club tana a goal hmasa ber a khung.

Man City-in nuam sa taka hnehna an chan theih nan keeper Ederson-a'n Jay Rodriguez goal khung tur a dansak a, minute li chhungin goal hnih an khung leh bawk.

Minute 66-naah Ferran Torres-a'n Premier League-a a goal hmasa ber a khung a, minute 69-naah substitute Phil Foden cross chu Mahrez-a'n tauh lutin hattrick a siam. 

Algerian forward hian Man City tana hattrick a siam hmasak ber a ni a, hemi hmaa hattrick a siam hnuhnun ber chu Leicester City tan niin an champion ṭum khan December 2015-ah Swansea lakah goal thum a khung.

Manchester City-in Tottenham 2-0 in an hneh lo a, insiamṭhat an mamawh hle. Sergio Aguero inhliam vangin tlarhmaah an buai a, goal khungtu an mamawh.

Brazilian forward Gabriel Jesus-a'n Aguero hmunruak a luah khat zo lo a, goal an khung theih loh avangin Pep Guardiola hoten an phu ang tawk result an hlawh chhuak ṭhin lo.

Burnley lakah erawh Man City-in goal an khung hma a, inkhel an thunun hle. Pep-a hote hian ball possession 69% an nei a, goal khung turin vawi 19 zet attempt an nei. De Bruyne-a'n goal ban a pet per a, Torres leh Jesus te goal khung offside vanga pawm a ni lo chungin goal nga an khung.

Man City manager Pep Guardiola chuan, "Tottenham hneh loh hnuah thawhchhuah kan mamawh a, kan khelh danah a lungawithlak hle. Chutihrualin insiamṭhatna tur erawh a awm zel a, tlarhma lama awm player tan khelhna hmun chang turin goal khung a pawimawh," tiin a sawi.

Pep Guardiola hote hian Thawhlehni zan hian Champions League-ah FC Porto an hmachhawn ang a, December 5, Inrinni zanah Fulham an mikhual ang.