Leicester tan insiamṭhatna hun

Leicester City-in Premier League match hnuhnung berah Liverpool an hmachhawn a, 3-0 in an mualpho. Brendan Rodgers-a hote hian zanin dar 11:00 hian Fulham an mikhual dawn a, Foxes tan insiamṭhatna hun ṭha a ni thei ang.

Rodgers hote hian inhliam vanga buai Reds hmachhawn tura  Anfield an lenluh khan point hmuh an inbeisei ang. Amaherawhchu kawng engkimah Jurgen Klopp-a naute an ngam lo a, goal luh danin inkhel kalhmang a sawifiah.

Leicester City hian Liverpool an hneh loh zawhah Braga nen 3-3 in an inhnehtawk a, Jamie Vardy-a'n hun tawp hma hretin a sut hram. Amaherawhchu Foxes khingpui Fulham hian record an la nei chhe zawk.

Scott Parker hote hian match hnuhnung pahnihah Everton leh West Ham an hneh lo a, table-ah pawh 19-naah an awm daih. Tun season-ah goal 18 ngawt an chhuah tawh avangin Foxes lakah pawh Fulham hian goal an chhuah a rinawm a, chutihrualin point hlawhchhuah an duh a nih chuan goal an khung ve a ṭul dawn a ni.