Juventus mualah Barca an zawr

Paulo Dybala goal mawi pa­hnih bakah Giorgio Chiellini tauh luh hmangin Juventus chuan an mikhual Barcelona 3-0 in an sawp. Massimiliano Allegri naute hian Juventus Stadium-ah Champions League match 18 chhung hneh loh an tawng lo a, Turin-ah hneh loh nei loa an kaltluan rei ber record thar a ni.

Barcelona hi khualmuala Champ­ions League knockout stage chin an khelh hnuhnung panga­ah vawi li an tlawm a, heng inkhelah te hian goal 12 zet an chhuah. April 19, Nilaini zan khian Nou Camp-ah quarterfinal second leg hi khelh a ni leh dawn.

Hei le Dybala
Thawhlehni zan inkhelah kum 2015 Champions League final an khelh ṭuma inkhel bulṭantu goalkeeper Gianluigi Buffon leh Leonardo Bonucci chuan a tir aṭangin Barcelona an hmachhawn leh thei. Barcelona hian hrem vangin midfielder pawimawh Sergio Busquets an chhawr thei lo a, Spain under 21 player Sergi Samper chuan inkhel bul a ṭan thung.

Ṭan phat aṭangin Old Lady (Juve sawina) hian Berlin-a an hneh loh Barca lakah tlawm nawn an tum lo tih a chiang. Italian manager Allegri-a'n an khingpui hlauhawm zia a hrechiang a, ruahmanna fing tak siamin a naute chu counter attack hmanga Barca bei turin a rem.

Minute sarihna a ni a, midfielder Juan Cuadrado-a'n box chhungah ball lalutin vengtu nei lo Dybala a pe. Argentine forward hian rang zeta vir puiin goal kilah a khung nghal, goal mawi leh ṭha a tling.

Luis Enrique nauten Paris-a an chetsualna thlen nawn tir an duh lo a, na takin an nawr let nghal. Lionel Messi ball pek ṭha zet dawngtu Andres Iniesta-a'n an siphurh sut theihna hun ṭha a nei nghal. Barca captain ball pet hi Buffon-a'n a lo dang pial hman hlauh - Juve an him!

Juve tan Dybala bawk a inlarzui leh nghal zat. Mario Mandzukic-a cross chu Dybala hian insiamrem ngai miah loin a hlap goal zui leh. Juve an hlauhawm chhunzawm, season hmasa Serie A top scorer Gonzalo Higuain goal khung tur chu Barca keeper Marc-Andre ter Stegen chuan ṭum thum zet ṭha takin a dan sak - second half minute10-naah Chiellini-a'n an goal thumna a tauh lut.

Turin kulhpui
Italian champion tan Turin hi thlamuanna kulhpui a ni. Juventus hian an khelmuala inelna hrang hrang an hma­chhawn 48-ah chak loh an nei lo. Juventus Stadium-a mikhual hnehna chang thei hnuhnung ber chu Udinese niin, kum 2015 August thla daih tawh kha a ni.

Juventus manager Allegri chuan, "Ka nauten fak an phu. Team ṭha Barcelona te ang kan hneh a nih chuan ka player-te khelh danah sawisel tur a awm lo tihna a ni. Kan khelmuala inkhel kan nih avangin inrintawkna kan nei sang a, kan lawmna ti zualtu ber pakhat chu goal kan chhuah lo kha a ni," tiin a sawi.

Allegri chuan inkhel a la zawh loh thu sawi chhunzawm­in, "Tunah hian lawm avanga sapatal chiam hun a la ni lo. Nou Camp-ah kan la inkhel leh dawn a, uluk leh zual a kan inbuatsaih a ngai dawn. PSG khan an khelmualah goal li an khung thei a, chumi hnua thil thleng kan hre vek," a ti.

Juve hian ball chang tlem zawk mah se goal hmaah erawh an hlauh­awm zawk. Barca-in contract thar ziak tura a duh chunga Turin pantu Dani Alves chu tlarhnungah player pawimawh a ni. Brazil international hi Catalan club hrechiangtu a nih avangin manager Allegri tan khelmual chhung leh pawnah mi ṭangkai a ni ngei ang.

A mak a na...
Spanish champion Barcelona-in La Liga an match hnuhnung berah Malaga 2-0 in an ngam lo. Club lian chu an chetsual zawh chiaha an insiamṭha hi midang tan dan an harsa ṭhin. Mahse, Turin-ah erawh Catalan club hi minute 90 chungin thochhuak tur awm angin an awm lo hrim hrim.

Tlarhnungah tawnhriat ngah tawk lo Samuel Umtiti bakah Jeremy Mathieu te an talbuai fo a, half time hnua midfield aṭanga defence laia pawh let Javier Mascherano-a'n an goal thumna luh kawngah Chiellini a veng hneh lo hle bawk. Barca hmachhuan Messi chu Juve tlarhnungin an dahṭha thei!

Messi lansarh loh zanah a kawppui Luis Suarez leh Neymar te an hriam tawk bik lo. Barca hian semifinal lut turin hnehna an chang dawn a nih chuan MSN mai ni loin khelmual chhunga player 11 te an khelh ṭhat vek a ṭul ang.

Barcelona coach Luis Enrique chuan, "Goal hmasa pa­hnih kha thilpek ang mai a ni, ka naute an talbuai tih hai rual a ni lo. PSG nena kan inkhelh ang ngawt kha chu a ni tawh dawn lo, chutihrualin beiseina erawh kan la nei thiang," tiin a sawi.

Champions League nomawi vawi nga chawi tawh Barce­lona hian last 16-ah Paris St-Germain chu si li fai an phurh hnuah an lehthal thei. Barca fan-ten semifinal lut turin beiseina an la nei a nih pawhin a mak lo. Mahse, PSG nena khaikhin chuan Juve hian European football-ah tawnhriat an nei ṭha zawk - Barca hian thil mak an thlen tir leh ang em tih chu karlehah chhanin a awm dawn.