Reds U18 coach tur Gerrard

English journalist langsar leh Britain chanchinbu lar The Times-a thawk lai Paul Joyce chuan Liverpool academy coach Steven Gerrard chuan season thar aṭangin Reds Under 18 team a enkawl dawn niin a sawi.

Paul Joyce chuan, "Jurgen Klopp leh academy director Alex Inglethorpe-te chu academy lama Gerrard hnathawh avangin an lawm a, coaching lama hma a sawn zel theih nan Liverpool U18 chu season thar aṭanga enkawl tir an rilruk a ni," a ti.

Kum 36-a upa Gerrard hian thla li liam ta khan inkhelh a chawlhsan thu a puang a, League One club MK Dons-in an manager ni turin dawr mah se England captain hian coach puitling ni tur chuan a tan a la hma mah mah nia sawiin he sawmna hi a hnar a ni.

Tun dinhmunah Liverpool U18 hi Neil Critchley chuan a enkawl mek a, Gerrard-a'n U18 a enkawl chuan Critchley hian Under 23 a enkawl thung ang. Reds U23 team hi coach Michael Beale chuan Brazilian club lian Sao Paulo-a assistant manager ni turin December khan a chhuahsan a, tun thlengin a aiawh tur a ngheta lakluh an la nei lo.