Vikings-in MSL champion lai TBL sawp

Mission Veng Vikings-in Mizoram Super League champion lai Khatla TBL chu Thawhlehni zan khan 81-60 in an sawp. TBL tan hian American player Chris Solomon, India star pahnih Vishesh Bhriguvanshi leh Garry Gill te an inlan vek avangin Vikings hi pangana chauh ni mah se champion thei zinga chhiar tel an ni tawh ang.

TBL hun

Khatla TBL-in rinkai zawk an nih ang ngeiin H. Laldinsanga, Vanlalmuana leh Gospel Lalthawmmawia te ho nen bul an ṭan ṭha zawk.

Mission Veng Vikings lamin inrintawkna an tlachham a, quarter hmasa bera Michael F. Lalawm­puia leh Ronald March te an lansarh hnuah mimala che ṭha fal an awm lo. Halftime-ah TBL-in 34-30 in hma an hruai a, Vikings-in relegate an hnaih hman hle.

Vikings hun

Ronald March-a'n Mission Veng tan phurna a thlen a, American player lansarh hnuah Mizo player-ten inrintawkna an nei a, Khatla TBL erawh a zuih zawngin an kal thung.

March hian point 26 a nei a, rebound vawi 14 a la a, double-double hi Vikings chakna kawng­ah a pawimawh hle. American player hian steal vawi li a nei a, Vishesh vawi hnih bakah Mapuia te laka a neih a nih avangin a hlu zual, March hian MSL-a MVP hmasa ber Mapuia lut tur a block sak bawk.

Zarkawt BCA aṭanga Vikings zawmtu Michael F-a'n a thiamna a pho chhuak leh tawh a, point 22 zet a nei a, captain Moses Zoremmawia langsar vur loin defence-ah a ṭangkai leh a, player hmuhnawm Lalrina Renthlei-a'n hun pawimawhah a rintlak tih a pholang bawk.

Kan phur - ChD-a

Mission Veng Vikings coach Reuben Lalchhandama chuan, "Chak ka la neih loh avangin inrintawkna kan hloh nasa a, inkhel ṭantirhah pawh a lang. Amaherawhchu halftime-a March leh Pethani ten court chhung leh pawna an thawhrimna rah kan seng a, Mizo player-te pawhin inrintawkna an nei leh tawh bawk. Tunah chuan semifinal kawng kan zawhin ka hria," tiin an result avanga a lawm thu a sawi.

Vikings coach ChD-a chuan sawi chhunzawmin, "Mipui

ṭawiawmna a ṭha a, kan chakna hnar a ni. Kan club hotuten hmanraw ṭha tak min pe a, hman thiam leh thiam loh chu kan kuta awm a ni," tiin mipui leh club hotute ṭangkaina a sawi lang.

TBL lam ve thung

Khatla TBL manager Lal­awmpuia Pachuau chuan, "Second quarter thleng kha chu kan khel ṭha zawk a, amaherawhchu March-a khelh ṭhat hnuah an Mizo player-te an khelh ṭhat avangin hun chanve hnu lamah khan kan ngam lo zawk a ni," tiin Vikings-in chak an phu thu a sawi.

TBL manager P. Om-a chuan sawi chhunzawmin, "Semi­-

final luh hi kan kuta awm a ni a, knockout stage kan thlen theih ngei hi kan ring tlat a ni. Ṭum dang ang thoin Khatla veng mipui leh veng pawna lam min ṭantuten min ṭawiawm ṭha leh a, an chungah kan lawm hle a ni," tiin Vanglaini palai a hrilh.

Rematch leh hmabak

Vikings hian April 15 khian Zarkawt Serpents nen rematch an khel ang a, chak tur a chiang lo. Mission Veng hian TBL an hneh theihna kawnga pawimawh Ronald March leh Rikin Pethani te an chhawr thei dawn lo.

Mission Veng hian April 20 khian league match hnuhnung berah Tuikual South an hma­chhawn ang a, Khatla TBL hian kar hnih bawr vel an chawlh hnuah April 27 khian Tuikual South nen an match hnuhnung ber an khel ang.

Inkhel Thlirna Tawi
Mission Veng Zarkawt BCA
Score
March 26 Mapuia 18
Micahel F-a 22 Solomon 12
Lalrina 13 Garry 8
Rebound
March 14 Garry 8
Moses 7 Muana 8

Mission Veng Khatla TBL
19 1ST 18
11 2ND 16
30 HT 34
28 3RD 11
23 4TH 15
81 TOT 60