Klitschko-a'n Joshua a vau

Ukrainian boxer ropui Wladimir Klitschko chuan April 29-a a hma­chhawn tur Anthony Joshua a vau lawk a, amah hmachhawn chu Mount Everest hma­chhawn anga maia harsa a nih tur thu a hrilh!

Kum 41-a upa boxer hian November 2015 khan Tyson Fury lakah a heavyweight title a chan a, kum 11 hnua a tlawm hmasak ber a ni. Joshua nen an inhmachhawn hunah hian IBF, WBA leh WBO champion kawnghren an inchung ang.

Klitschko chuan, "Jo­shua nena kan inhma­chhawn tur hi inhnek ka hmachhawn tawh zawng zawnga pawimawh ber a ni dawn. Mount Everest chu i lawn chhuak thei a ni mai thei a, chu chuan a ropuina erawh tidanglam loin a ding reng ṭhin. Chutiang chiah chuan keipawh ka ding reng a ni," tiin a sawi.

Joshua hian kum 2013-a professional boxing a luhchilh hnuah vawi 18 inhnek hma­chhawn tawhin a khingpui a knockout vek a, vawi 64 inhnek a hma­chhawna mi 53 knockout thei Klitschko hi a boxer hmachhawn tawha hautak ber a ni thung ang.

Klitschko chuan sawi chhunzawmin, "Nitinin hun ṭha i nei reng thei bik lo. Tun hnaia boxer ṭhangduang tak ka hma­chhawn dawn a, ka hlim a ni. Tu nge tun ang hunah ka hmachhawn tawh chuang ang? Title nei let turin hun ṭha siamsak ka ni a, boxer pahnih hian chak chance 50-50 in kan neiin ka hria," a ti.

Wembley-a boxer pa­hnih inhnek tur hi mi 90,000 talin a hmunah an en rin a ni a, heti zat mipui an kalkhawm thei a nih chuan Britain-a inhnek entu tam ber ṭum kum 1939-a light-heavyweight boxer Len Harvey leh Jock McAvoy te White City Stadium-a an inhnek entu zat kha an nihrual dawn tihna a ni.