Delhi tan Supergiant an lian tawk lo

Thawhlehni zan Indian Premier League inkhelah Delhi Daredevils chuan mikhual tlangnel zia an chhuah a, an mikhualna ramah Rising Pune Supergiants chu run 97 ngawtin an sawp.

Maharashtra Cricket Association Stadium, Pune-a inkhelah Delhi an bat hmasa zawk a, Sanju Samson a langsar hle. Mikhual team tan opener Aditya Tare chu run siam loa a out hnuah a dinpui Sam Billings chu run 24 chiah siamin a out ve leh a, Pune an pawr hman hle.

Mahse, Delhi tan rin loh lam aṭangin Sanju Samson a inlar a, kum 22 leka upa wicket-keeper batsman hian ball 63 lek a hmachhawnah run 102 zet siamin hmun himah Delhi a hlangkai - ball kuaa run 38 siama a tawp thleng dam Chris Morris chuan a pui ṭha takzet bawk.

Delhi-in over 20-ah run 205 an siam a, wicket li chiah an hloh. Batting line-up nei ṭha Pune-in an khelmualah tlawm duh loin theihtawp chhuah mah se Delhi tan bowler Zaheer Khan leh Amit Mishra te inlar ve lehin wicket thum ve ve an la a, Pune tana run siam hnem ber Mayank Agarwal pawhin run 20 bak a tlin lo!

Over 16.1 an khelh tlin meuh chuan Pune-in wicket an hloh vek a, run 108 bak an tlin lo - an mualah mualpho takin an tlawm. Zanin dar 8:00-ah IPL inkhel a awm lehnghal dawn a, Kolkata Knight Riders leh Kings XI Punjab an inhmachhawn ang.