BAI President Akhilesh a thi

Nimin khan Badminton Association of India president Akhilesh Das Gupta chu lungphu chawl vangin a pianna Lucknow-ah a thi, kum 56-a upa a ni.

Das Gupta hi kum 2010 aṭang khan BAI president a ni ṭan a, a kaihhruaina hnuaiah India hian nasa takin badminton inelnaah hma a sawn. London leh Rio Olympic-ah bronze leh silver medal lain he infiam­nnah hian bung thar a kaipui a, shuttler-ten sum leh paia an dinhmun an siam ngheh theih nan khawvela badminton inelna zinga lawmman sum fai tamna ber Premier Badminton League (PBL) a buatsaih sak bawk.

Sports minister Vijay Goel chuan, "BAI president Akhilesh Das Gupta a liam ta mai hi a makin min barakhaih hle. A kalsan tak a chhungte ka ṭawngṭai puiin thlamuang taka an awmtheih ka duhsak," a ti.

BAI chuan twitter kaltlangin an president thi an ui thu an tarlang nghal a, India hmeichhe player zinga Olympic badmintion inelna bika medal la hmasa ber Saina Nehwal pawhin Das Gupta hi a ui thu a tarlang ve bawk.