Russia infiammi 7 fihlim belh

International Asso­cia­tion of Athletics Fe­de­rations (IAAF) chuan Russian infiammi pasarihte chu khawvel huap inelna hmachhawn thei tura an fihlim thu an ti chiang leh ta.

Russia hian an ram sorkar hriatpuina ngeiin an infiammite chu dan phal loh thil an tihpui tih hriat chhuah a ni tawh, he thil thleng avang hian kum 2015 November thla khan IAAF chuan Russian infiammite chu athletics huangchhungah an inrawlh a khap.

IAAF lamin an hrem­na an pawhsei zui avangin nikum Rio Olympic-ah pawh khan Russia athlete-te hi inlan thei lo tura ngaih an ni. Mahse, International Olympic Committe (IOC) chuan dan leh hrai a zam thar zawm famkim theite chu 'neutral athletes' anga an inlan a phal sak!

Kumin August thla hian London-ah World Championships neih tur a ni a, IAAF hremna hi kaltlangpui zel chu nise Russian infiammite tan inlan ve theih a ni lo.

Amaherawhchu, IAAF chuan ruahmanna thar siamin infiammi en­dik hnua dan an bawhchhe lo tih a hriatchiante tan kawng a hawng. Hetiang a nih takah chuan he huna inlan tur hian Russian athlete pasarih te chu an inlan thei dawn tih a chiang leh tawh - an zingah hian 10m hurdles leh high jump world champion ni lai Sergey Shubenkov leh Mariya Kuchina te pawh an tel.

Nikum khan Russian athlete pahnih chuan World Championships khel thei turin endikna an lo paltlang tawh, February thla khan mi pathumin paltlang ve lehin tunah chuan athletes 12 an fihlim tawh. Rio Olympic ang thoin heng infiammite hi Russia aiawh erawh chuan an la inlan thei dawn lo a, 'neutral athletes' an ni leh ang.