Bagan tan Jeje goal a tawk lo ; Shillong Lajong-in Aizawl FC beiseina siamsak

Kolkata Derby-ah Mohun Bagan-in harsatna nei loin East Bengal hneh mah se, Shillong-ah result ṭha an chhunzawm thei lo. Nimin tlai I League inkhelah Bagan tan Jeje Lalpekhlua'n goal a khung chungin Lajong nen 1-1 in an inhnehtawk.

Mariners hian vawi 15 khelhah Aizawl FC point hmuh zat 30 an hmu ve chiah a, Mizo club aia head to head-a an ṭhat zawk avang chauhin Kolkata club hi I League hmahruaitu an ni.

April 22 hian Mohun Bagan hian RG Stadium, Mualpuiah Aizawl FC an hmachhawn dawn a, he inkhel hi India ram pum ngaihven tur a ni.

Isaac leh Samuel

Shillong Lajong-a Mizo player pahnih Samuel Lalmuanpuia leh Isaac Vanmalsawma ten Aizawl FC champion theihna turin an theihna zawng zawnga an khelh tur thu an sawi a, an match hnuhnung bera DSK Shivajians laka goal khungtu pahnih hian inkhel bul an ṭan ve ve.

Lajong boss Thangboi Singto-a'n DSK an hneh ṭum aṭangin player pahnih a thlak a, chakna goal khungtu Redeem Tlang leh Romanian defender Dan Gelu Ignat te chu inkhel bul ṭantir an ni.

Mohun Bagan coach Sanjoy Sen erawhin Jeje Lalpekhlua chu bench-ah a ṭhuttir a, tlar hmaah Darryl Duffy leh Balwant Singh te chu inkawptir an ni.

Lajong an chungnung

Shillong Lajong-in first half an thunun a, coach Thangboi Singto hote ball inpe kualah mikhual Mohun Bagan an talbuai hle.

Minute 17-naah Lajong forward Aser Pierrick Dipanda siam chu Redeem Tlang-a'n box pawn aṭangin ṭha takin pet mah se, Bagan keeper Debjit Majumder-a'n a dan hnuah goal ban a per - mikhual team an him.

Minute hnih hnuah Bengali keeper Debjit-a'n Cameroonian forward Dicka-a goal khung tur a dansak leh bawk. First half-ah Lajong keeper Vishal Kaith-a'n hna nei ve tho mah se, Jeje tel lohna Bagan goal nawr a na tawk lo.

Jeje leh goal

Second half-ah goal a lut lawk lo a, goal khung turin Mohun Bagan forward Jeje-a chu minute 69-naah luhtir a ni.

Goal khung thei bik Mizo tlangval hian a luh aṭanga minute ruk lekah midfield aṭanga a ball hmuh chu dam dapa la thlain Lajong keeper Vishal Kaith chu 'cool' takin a pet khum.

Bagan tan a hunah tak Jeje-a inlar mah se Sehnaj Singh handball vangin penalty an chawi a, minute 75-naah Lajong forward Dicka-a'n si phurh sut nan a pet goal. Minute 15 chhungin goal dang a luh belh tawh lo a, Shillong-ah Bagan-in point hnih an hloh.

AFC beiseina

Mohun Bagan hian April 15 khian Punjab-ah Minerva Punjab an hma­chhawn leh nghal dawn a, March 19-ah Kolkata-ah letin AFC Cup-ah Maldives club Maziya an khelhpui leh nghal ang.

Ni thum hnuah Mariners hian Aizawl FC hmachhawn turin Mizoram an rawn tlawh ang a, he mi zawh hian kumin I League match hnuhnung berah Chennai City an hmachhawn ang.

Aizawl FC hian Churchill Brothers, Mohun Bagan leh Shillong Lajong te an la mikhual dawn a, an elpui ber Mariners nen an la inhmachhawn dawn avangin an kutah nomawi a la awm.

Mizo club hian Inrinniah Goa-ah Churchill Brothers an hneh theih a, RG Stadium-ah Mohun Bagan hi khualmuala an chak lohna zat 3-2 aia ṭhaa an hneh theih chuan Mizoramah ngei nomawi an chawi thei ang.