Ka hma hunin player a nghawng lo - Wenger
Arsenal manager Arsene Wenger chuan a hmalam hun chiang thei rih lo chuan player-te ah nghawng a neih loh thu a sawi a, hetih rual hian Crystal Palace laka an mualphona chu lungchhiat thlak a tih thu a sawi tel bawk.
Premier League-a parukna Arsenal hi Thawhṭanni zan khan Crystal Palace lakah 3-0 in an tlawm a, Wenger-a'n a enkawl chinah Arsenal hian Champions League an vawi khat khelh lohna tur an tawng ngei dawn niin a lang tawh - league match riat khelh tur an la nei.
Season tawp ruala a contract neih lai tawp ve tur Wenger chuan, "Arsenal hi match 1,100 chuang ka enkawl tawh a, hetiang em em a chak loh tluan hi kan la nei ngai lo. Kan result chhe tak hi pawm thiam mai theih a ni lo a, a rang thei ang berin a siamṭhat dan tur kan ngaihtuah a ngai," a ti.
Kum 67-a upa Wenger chuan sawi chhunzawmin, "Fans lamin an lungawi lohna an lantir hi ka hrethiam, anni hi chuan result ṭha neih reng hi an duh a ni. Ka hma hunah thil thar sawi tur a awm lo, hei hian player-te ah nghawng a neih pawh ka ring lo," a ti.
Gunners hian tun season-ah FA Cup bak beisei an nei tawh lo, tun hnai kum thum chhunga vawi hnih an champion theihnaah hian final lut tur chuan April 23-ah Manchester City an hneh a ngai ang. City an hmachhawn hma hian league match-ah Middlesbrough an hmachhawn leh phawt ang.