Rooney enkawl Derby an inhnehtawk

Wayne Rooney-a'n Inrinni zan khan ama pualin a vawi khat nan Derby County a enkawl a, anmahni ang bawka talbuai Wycombe Wanderers nen 1-1 in an inhnehtawk. 

Rams hian tun thlatira manager Phillip Cocu an ban hnuah Rooney, Liam Rosenior, Shay Given leh Justin Walker te chu team enkawl turin an ruat a, goal khung loin Bristol City leh Middlesbrough lakah an tlawm.

Derby thuneituten Rooney chu mimalin team enkawl lailawk turin an ruat a, iPro Stadium-ah Wycombe Wanderers an mikhual. Rooney hoten minute 36-naah Duane Holmes hmangin hma an hruai a, Wycombe-in minute 81-naah Matt Bloomfield hmangin an sut a, chak zawk an awm lo.

Inkhelh banah Derby manager lailawk Rooney chuan, "Tawnhriat nei ṭha player luhtir a, tun hnaia kan khelh aia ranga khelh kha ka duh. Tunlaiah chuan inkhel thunun a, ball 600-700 in pass te an duh ṭhin. Amaherawhchu tun dinhmunah chuan kan tlin rih lo. Kan khel ṭha a, goal hnihna kan khung loh kan tuar a ni," tiin a sawi.

Derby hian match 14 aṭangin point sarih chauh an hmu a, table-ah 24-naah an awm mek.