Aizawl FC kawngah Goan club
Mizoram chhung ngeia Aizawl FC-in I League champion nemngheh an tum a nih chuan hnehna an la chan ngai lohna hmun Goa-ah point thum an hlawh chhuah a ṭul dawn.
Vawiin tlai dar 4:30 hian Tilak Maidan-ah Mizo club-in Churchill Brothers an hmachhawn ang a, zan dar 7:05-ah champion tura rinkai ber Mohun Bagan-in kai thar Minerva Punjab an lenchilh bawk ang.
Inkhelh harna Goa!
Santosh Trophy hnuhnung ber kha Goa-ah khelh a ni a, Mizoramin semifinal-ah penalty shootout hmangin champion zui ta West Bengal an hneh lo. Mizoram team enkawltute an chak loh chhanah khaw lum chhuanlam lo mah se inelna ṭantirh aṭangin khaw lum vanga khelh a harsat thu an zep lo.
Aizawl FC pawhin Goa-ah result ṭha an nei bik lo a, season liam ta khan I League-ah Goan club pahnih Sporting Goa (1-1) leh Salgaocar (1-1) te an draw ve ve. Nikum Federation Cup semifinal-ah AFC-in Sporting Goa hnehin semifinal an lut a, amaherawhchu an chak dan hi away goal rule a nih avangin league match chu ni se Goa-ah hian point khat chauh an hlawh chhuak ang.
An danglam tawh em?
Mizo club hian tun season-ah Mahmoud al Amna an lalut a, Syrian midfielder hian Sporting Goa-ah season khat a khel tawh. AFC striker Kamo Stephane Bayi-a'n season liam ta khan Goan Pro League-ah Salgaocar tan a khel bawk.
AFC keeper Albino Gomes hi Goan a ni bawk a, nikum khan Salgaocar tan inziak lut mah se khelhna hun pek a ni lo. Tun season-ah Albino hi Mizo club innghahna a ni a, khaw luma buai tur a ni lo. State pawn player pahnih dang Jayesh Rane leh Ashutosh Mehta ten khaw lumah tawnhriat a nei ṭha tawh a, I League club dang tana Mizorama inkhelh a harsat aiin Aizawl FC tan Goa-a inkhelh a awlsam zawk dawn tihna a ni.
Intawnna hmasa
Aizawl FC hian RG Stadium-ah Churchill Brothers hi 3-1 in an hneh a, Mizo club an chungnung zawk tih goal luh danah a lang. Amaherawhchu, AFC hian an muala match riat an khelh tawhah vawi sarih an chak a, vawi khat inhnehtawkin chak loh an nei lo.
Khualmualah erawh Mizo club record a chhuanawm bik lo a, vawi sarih an khelh tawh aṭangin vawi hnih chiah an chak a, vawi thum chak loin vawi hnih an inhnehtawk. Aizawl FC hian khualmualah point riat chiah an hlawhchhuah avangin Churchill Brothers nena an intawnna hmasa hi zanina an inkhelh hun atan tehfung rintlak a ni lo ang.
Churchill an ṭha
Churchill Brothers hian an mualah Mohun Bagan leh Bengaluru FC te an hneh a, khualmualah East Bengal an hneh bawk. Season ṭan hmaa champion tur a rinkai pathum hneh thei vek Goan club hi an ṭha thaw khat tih a chiang.
Goan club hian international break zawha an match hmasa berah Mumbai FC nen goal awm loin khualmualah an inhnehtawk a, Tilak Maidan-a an match hnuhnung berah goal awm loin Shillong Lajong an draw bawk. An record thlirin Churchill tlarhnung a phui ṭha tih a lang a, tlarhma lamah Anthony Anton Wolfe leh Ghanefo Ansumana Kromah te inkawp chu ven tham an ni bawk.
Beiseina nen
Aizawl FC-in an match hnuhnung berah Bengaluru FC an hneh lo a, Blues chakna goal hi injury time-a lut a ni. Mizo club coach Khalid Jamil chuan, "A êng zawngin kan hmalam hun kan thlir tur a ni. Churchill nena kan inkhel tur hi a pawimawh em em a, chuvangin kan tumah kan chiang tur a ni. Inhliam kan nei lo a, kan theihna zawng zawngin kan khelh a ṭul a ni," tiin Vanglaini palai a hrilh.
Mizo club hian nomawi chawi turin club dang result-ah an innghat lo, Churchill Brothers hi an hneh theih a, RG Stadium-a Mohun Bagan an hneh leh bawk chuan I League champion an ni thei ang. April 22-a Aizawl FC leh Mariners inkhel boruak sanna belhchhah turin vawiin tlai inkhel result hi a pawimawh dawn a ni.
Kolkata club
East Bengal-in Kolkata Derby-a an hmelma an Mohun Bagan an hneh loh avangin nomawi chawi an inbeisei tawh lo a, chutihrualin zanin inkhel result a zirin Pathianni tlaia DSK Shivajians an hneh chuan beisei an la nei chhunzawm zel ang.
Aizawl FC elpui ber Mohun Bagan-in Punjab-ah Minerva Punjab an hmachhawn dawn a, Kolkata club tan hna harsa tur niin lang lo mah se Guru Nanak Stadium a ṭhat tawk loh avang leh Mariners player-te an chauh dawn avangin chak tur a chiang bik chuang lo.