AIFF-MFA Futsal Workshop-ah Club aiawh pakhat ṭheuh tal

Mizoram Football Association chuan thuchhuah siamin, April 18, 2017-a All India Football Federation leh Mizoram Football Association ṭangkawpin Rajiv Gandhi Stadium, Mualpuia Futsal lam zir chianna leh bul ṭanna tur, "Futsal Introductory Workshop" a neih turah Mizoram Premier League club aiawhte leh Aizawl District Football Association hnuaia division hrang hrang club, Aizawla awmte chu club aiawh pakhat ṭheuh tal tir turin a hriattir.

Anni bakah hian he workshop-a tel duhte chu MFA Office, City Park-ah April 17 thleng office hun chhungin registration fee Rs 50/- pein a inziah luh theih a, MFA Futsal Committee chuan Futsal lama tui mi tu pawh tel turin a sawm.

Futsal Introductory Workshop-ah hian resource person atan Sanjay Kumar, AIFF Senior Manager, Com­peti­tions a lo kal dawn a, amah hi Asian Football Confederations hnuaia Futsal leh Football-a Match Com­mis­sioner a ni.

MFA Futsal Cup 2017 chu May 4 aṭangin Aizawlah khelh a ni dawn a, hemi atan hian eng team pawh tel theih niin April 11-28 thleng MFA Office-ah entry fee a pek theih.

Registered Player

MFA thuchhuah tarlan danin MFA, District FA leh District hnuaia Zone FA hnuaia registered player zawng zawngte chu April, 2017 thleng chiah AIFF/MFA/DFA pawmpui loh inelnaah an khel thei dawn a, MFA-in Futsal a kalpui ṭan hun May, 2017 aṭang chuan registered player-te hi chu an hriatpui inelnaah chiah tel an phalsak ang.

Hemi chungchangah hian District FA-te leh Mizoram Premier League Club lamte pawh hriattirna pek an ni tawh.

MFA chuan Futsal hi AIFF duh angin kalpui an tum a, tunah hian a bulṭanna workshop an neia ng a, technical leh match official training-te pawh buatsaih zel an tum.