Jose Mourinho a tlawm leh dawn?

Manchester United manager Jose Mourinho chuan a club hlui Chelsea chu a vawi khat nan Pathianni zan dar 8:30 hian Old Trafford-ah a mikhual dawn.

Premier League nomawi a chawipui zawh season-ah Blues hian Mourinho an ban a, London club a zawm hmasak zawk ṭuma 'The Special One' tiha inchhal hian January pawh a thleng zo lo. Portuguese manager-in United a enkawl hnuah Stamford Bridge-ah ṭum hnih a lenglut tawh a, chak ni hmel a hmu lo; goal nga chhuahin an pet goal ve miah lo!

Mourinho-a'n Blues a hneh loh tawhna match hnih hi khualmual a nih avangin a hraitthiam theih, tun ṭuma an inkhelhna tur erawh Old Trafford a ni tawh dawn. Jose hi a vawi thum nan a tlawm leh a nih ngat chuan chhuanlam tur a nei thei lo ang.

United hi Europa League-a Anderlecht nen 1-1 a inhnehtawk hlim an ni. Mourinho naute hi Belgium-a an zin chauh laiin Chelsea erawh April 8-a Bournemouth an hneh hnuah match dang an la nei lo.

Antonio Conte nauten nikum November 20 aṭangin league table chung ber an luah, nomawi chawi turin inkhelh hmabak pasarihah point 15 bak an mamawh tawh lo. Inrinni tlai dar 5:00-a Tottenham leh Bournemouth inkhel result a zirin an point mamawh zat hi a danglam thei bawk.

Blues manager Conte chuan, "England-ah chuan inkhelh hmabak pasarih la neih hi a tam hle, nomawi chawi tur chuan hmabak hautak paltlang tur kan la ngah," a ti. United khelmual hi Italian manager-in hna hautak a thawhna tur pakhat chu a ni ngei ang.

Chelsea hian an match hnuhnung 15-ah vawi 12 hnehna chang thei mah se match pakuaah goal an chhuah, an tlarhnung a phui tawk lo. United lam hi inchhuang thei an ni bik lo, an khelmuala league match an khelh hnuhnung pangaah ṭum li chu an khingpuite an inhnehtawk pui.

Anderlecht an draw hnuah United manager Mourinho chuan, "Manchester United defender chu ni ta ila, kan tlarhmate khelh dan hian min barakhaih khawp ang," tiin goal khung theihna hun ṭha an hlah avanga chak zo loah a inngai a, defender-te erawh a sawisel duh lo.

Man United hian tun season inelna hrang hrangah goal 46 chiah an la khung a, an elpui Chelsea, Tottenham, Liverpool, Manchester City leh Arsenal te chuan goal 60 an khung tling vek tawh.

Tun season-a United tana goal khung hnem ber chu Zlatan Ibrahimovic (28goals) a ni. Swede striker bakah hian Juan Mata leh Henrikh Mkhitaryan te chiah goal 10 khung tling thei an ni - EPL club 20 zinga goal chhuah tlem ber pathumna Blues (25goals) laka hnehna chang turin tlarhma lam an ṭhanharh a ṭul ang.