Cristiano Ronaldo-a'n Champions League-ah goal 100 a khung ta!
Cristiano Ronaldo-a'n Champions League-ah goal 100 a khung ta! Real Madrid star hian Nilaini zan khan Bayern Munich lakah goal hnih khungin a club hi 2-1 in hnehna a chanpui.
Allianz Arena-a quarterfinal first leg inkhelah Arturo Vidal chuan minute 25-naah goal hmahruai a khung. Chile international midfielder hian an hmahruai sawh ngheh theihna hun ṭha nei mah se penalty a chhuih lut lo.
Real Madrid tan Ronaldo-a'n an siphurh a sut hnuah Bayern midfielder Javi Martinez chu yellow card vawi hnih hmuh vangin hnawhchhuah a ni. Portugal captain hian minute 77-naah a goal hnihna leh an chakna goal ni bawk a khung.
Thawhlehni zan hian Bernabeu-ah second leg khelh a ni leh dawn. Vawi 11 champion tawh leh nomawi kawltu ni bawk Real Madrid tan European Cup semifinal vawi 23 an luhna turin kawng a in hawng zau. Zinedine Zidane-a naute hian tun season inelna hrang hranga match 53 an khelh tawhah goal an khung vek.
Bayern hian hliam vangin tun season inelna hrang hrang match 40 a khelh aṭanga goal 38 khung thei Robert Lewandowski an chhawr thei lo, an goal bawh na tawk lo an tuar. A zawna Champions League match 19 chhung hnehna an chan theihna hmunah an tlawm avangin an hmabak a hautak sawt ang.
Goal 100
Bayern Munich an hmachhawn hmain Ronaldo hian thla sarih chhung zet chu Champions League-ah goal a khung lo! UCL-ah hian darkar 11 leh a chanve zet goal a khung loh zawn avangin a vanglai a chuai nia sawi a awm hman.
Mahse, German champion lakah Ronaldo inlarin goal hnih a khung bakah goalkeeper Manuel Neuer tan hna hautak a siamsak fo. Allianz Arena-a a chetdan hmutu tan kum 32-a upa Ronaldo hi 'tar' tia sawi a har ang.
Manchester United forward hlui Ronaldo hian Real Madrid tan UEFA club competition-ah match 82 a khelh aṭangin goal 84 a khung. Premier League club tan season ruk chhungin goal 16 a khung hman tihna a ni.
Ronaldo chuan, "Europe-a goal 100 khung tlin hi ka tan thil ropui tak a ni. Champions League-a ka goal hmasa ber ka khung khan tun hun ang hi ka tawng ang tih ka ngaihtuah phak lo. Career ropui tak ka hman theih nana hun ṭha min petu Real Madrid chungah ka lawm hle," a ti.
Eng nge an sawi?
Real Madrid manager Zinedine Zidane chuan, "Mikhual tana inkhelh harsatna hmuna hnehna chan theih hi a hlu hle. Goal kan phurh hnuah penalty an hlah zui hlauh a, kan vanneih phah. Red card pek an nih hnuah kan tan kawng a in hawng, keeper Neuer a khelh ṭhat em avangin goal dang kan khung belh ta lo a ni," tiin a sawi.
Bayern Munich boss Carlo Ancelotti, "Madrid-ah minute 90 chhung chu hna harsa leh hautak zet kan thawh a ngai dawn. Penalty kan chhuih luh loh aṭanga minute thum hnuah an siphurh an rawn sut, club lian laka tlem zawk ni chunga khelh ṭhat zui chu a harsa tawh," a ti.
First Leg - Results
Dortmund 2 - 3 Monaco
DOR : Dembele 57'; Kagawa 84'
MON : Mbappe 19', 79'; Bender 36' (OG)
Atletico Madrid 1 - 0 Leicester City
ATL : Griezmann 28' (P)
Bayern Munch 1 - 2 Real Madrid
BAY : Vidal 25'
RMD : Ronaldo 47', 77'
Second Leg - Fixtures
April 19, Thawhlehni zan
12:15 AM Leicester City vs Atletico Madrid
12:15 AM Real Madrid vs Bayern Munich
April 20, Nilaini zan
12:15 AM Monaco vs Dortmund