Warriors hmachhawn tur Blazers
Pathianni zan aṭangin 2017 NBA Playoff khelh ṭan a ni dawn, dar 1:00-ah Western Conference champion Golden State Warriors chuan Portland Trail Blazers an hmachhawn ang.
Golden State hian regular season-ah khan match 67 hnehna changin vawi 15 chak loh an nei a, Western Conference record nei ṭha ber an ni. GSW hmachhawn tur Blazers hian vawi 41 hnehna changin an chak zat chiah hi an tlawm bawk.
February 25 khan Warriors hi playoff khel turin an tling chiang tawh, NBA chanchinah playoff khel tura tling rang ber an ni, nikuma anmahni record lo siam tawh chu ni hnihin an khum.
Eastern Conference aṭanga tling hmasa ber chu Cleveland Cavaliers niin March 19 khan an tling - NBA champion lai hian Pathianni zan dar 12:30-ah Indiana Pacers an hmachhawn ang.
Kumin NBA season hi a vawi 71-na niin team 30 an inlan a, Eastern Conference leh Western Conference-ah team 15 ve ve an awm. Team tin hian match 82ṭheuh an khelh hnuah table-a a sang pariat chin zel chu playoff khel turin an tling.
Playoff hi best of seven series-a khelh tur a ni. First round-a chak zawkin conference semifinal an lut ang a, conference final khelh zui tur niin conference pahnih champion te hian NBA Finals an khelh leh dawn a ni.