Zarkawt BCA an la chak vek Zaninah MSL-a rematch hmasa ber

Mizoram Super League Season 3-ah Zarkawt BCA-in Nilaini zan khan Chanmari Hollow 90-82 in an hneh a, tun season-ah vawi li inlan tawhin an khingpui an la hneh vek. Zarkawt club pakhat zawk Serpents erawhin hneh an la nei lo a, zanin dar 8:00 hian Mission Veng Vikings nen MSL history-a rematch hmasa ber an khel ang.

BCA an tlo 

Inkhelh ṭan phat aṭangin Zarkawt BCA Mizote an khel ṭha a, quarter hnihna aṭangin Amritpal leh Yadwinder Singh te hmangin inkhel an thunun zui bawk. Chanmari Hollow tan Lalhmachhuana'n point 32 tehmeuh neiin rebound vawi 15 zet nei mah se state pawn player nei ṭha BCA a chungnung zawkah an ṭang char char a, MSL kaithar Hollow-in champion tura rinkai Zarkawt club tan harsatna an siam lo.

Zarkawt BCA hian point 90 an tlin a, MSL3-a team khatin match khata a luh hnem ber ṭum a ni. MSL1 finalist BCA tan Amritpal leh Yadu anṭangkai a, Mizote pawhin nasa takin MSL2 aiin hma an sawn tih a hmuh theih bawk. BCA hian point riat an hmuh tawh avangin hmahruaitu an nichiang tawh a, April 21 khian an match hnuhnung berah Zarkawt Serpents an hmachhawn ang.

Rematch chu

March 24, Zirtawpni zanah Mission Veng Vikings-in Zarkawt Serpents chu 67-66 in an hneh a, Vikings guard Michael F. Lalawmpuia'n chakna point hi freethrow aṭangin a khung. Amaherawhchu technical committee-in an en let hnuah referee-in foul a ham hian buzzer (hun a zo tih hriattirna) a ri hman tiin rematch turin thutlukna an siam a, zanin hi an inkhelh ṭhat hun chu a ni.

Rematch-ah hian an intawn hmasak ṭuma player 12 te bawk an inlan leh dawn a, Vikings lamin an American player Ronald March leh India player Rikin Pethani te an chhawr thei dawn lo tihna a ni.