Bayern-in Dortmund an kalsan

Inrinni zan Bundesliga inkhelah Bayern Munich an chak laiin an elpui Borussia Dortmund an tlawm thung a, German club lian pahnih hi nomawi inchuh tur an nih avangin chak lo Dortmund tan a pawi.

Bayern hian an mikhualna ramah VfB Stuttgart 3-1 in an luhchhuah, inkhel dangah Dortmund erawh team talbuai Cologne mualah 2-1 in an tlawm thung. Match kua ve ve an khelh aṭangin team pahnih inkarah point li a awm.

Werder Bremen laka an chak zawh loh vangin Bayern tan insiamṭhat a ngai a, VfB Stuttgart lakah pawh a chesual hmasa an ni. Minute 20-naah Lassana Coulibaly chuan Silas Wamangituka siamsak chu goal hmahruai atan a khung.

Hansi Flick-a'n chetsual nawn a tum lo, a naute chu na taka nawr let turin a fuih. Kingsley Coman leh Robert Lewandowsk te hmangin chawlhlawk hmain hma an hruai let a, second half-ah Douglas Costa chuan an chak a nemnghet.

Bayern striker Lewy-a'n tun season Bundesliga bikah match riat a khelh aṭangin goal 12 a khung a, a ṭhiante khung tur vawi li a siamsak tawh bawk. Nomawi chawi thei turin a team chu chak takin a kalpui.

European champion hian Thawhlehni zanah Atletico Madrid an lenchilh zui ang. Champions League group A aṭangin Bayern hi an tling tawh a, Spanish club erawh tla thei an la ni thung.

Cologne tana Ellyes Skhiri goal hnih khung chu Thorgan Hazard-a'n sut ṭhen mah se an sut zo thei lo a, anmahni mual Signal Iduna Park-ah ngei Dortmund an tlawm. An tan Bundesliga title lak a harsa sawt ang.

Striker ṭhangduang Braut Haaland leh Manchester United hel lai Jadon Sancho ten goal an sual chhuak zo lo. Kum 16 mi Youssoufa Moukoko chu hun tawp lam minute 22 chhung khelhtir ni mah se danglamna a siam bik lo.

Dortmund manager Lucien Favre chuan, "Cologne kha an khel ṭha hle, keini lam erawh a changin kan hmanhmawh lutuk a, dawhtheihna nei hret ila chuan goal khung belh thei tur pawh kan niin ka hria.

"Ball inpek kual ringawt hi a tawk lo, awmze neia inpek bakah chet ran leh muan hun kan zir a la ngai. Kan chak loh avang hian kan chhe ta duai tihna erawh a ni bik lo," a ti. Dortmund hian Nilaini zanah UCL khel turin Lazio an mikhual ang.