World Cup khel tur Remsiami

FIH Women's Hockey World Cup khel tur player tar chhuah a ni a, an zingah hian Lalremsiami Hmar pawh a tel. Inelna hmachhawn tur hian Hockey India chuan ram chhunga hmeichhe hockey khel thiam bik player 18 a ko a ni.

July 1-17 chhungin Netherlands leh Spain chuan FIH Women's Hockey World Cup hi an thleng dawn. India hi Pool B-ah England, New Zealand leh China te nen an awmkhawm dawn.

India hian an match hmasa ber atan July 3 hian England an hmachhawn dawn. Ram pahnih hi Tokyo Olympic-ah khan an intawng a, bronze medal inchuhna inkhelah India an chak lo - World Cup-ah chuan phuba lak ngei an tum ang.

Rani Rampal chu hliam vangin koh a ni lo a, captain atan goalkeeper Savita chu ruat a ni. Haryana nula Savita hian vawi tam tak India a lo chhanhim tawh ṭhin, tun ṭumah pawh hian kum 31 mi keeper chungah mawhphurhna a sang leh dawn.

India chief coach Janneke Schopman chuan, "Hliam vangin Rani a tel thei dawn lo, ani bak chu Olympic khel player an la kim thei. Tokyo Olympic hnuah pawh tawnhriat tam tak kan nei leh tawh. Tournament khelh kan nghakhlel tawh hle," a ti.

Tun hnai khan India hian FIH Pro League an khel. Inelnaah hian Mizo nula Remsiami pawh a tel a, goal pawh a khung. World Cup leh FIH Pro League inkarah hun a tam lo a, chutih rualin khelho ṭhang leh awmkhawm reng an nih avangin an buai lo tura ngaih a ni.

FIH Women's Hockey World Cup 2018-ah khan India hian quarterfinal an thleng a, mahse penalty-ah Ireland an ngam lo. Beiseina sang zawk nan kuminah inelna an hmachhawn leh ang.

India Squad:

Goalkeepers: Savita (C), Bichu Devi Kharibam

Defenders: Deep Grace Ekka (VC), Gurjit Kaur, Nikki Pradhan, Udita

Midfielders: Nisha, Sushila Chanu Pukhrambam, Monika, Neha, Jyoti, Navjot Kaur, Sonika, Salima Tete

Forwards: Vandana Katariya, Lalremsiami, Navneet Kaur, Sharmila Devi

Replacement Players: Akshata Abaso Dhekale, Sangita Kumari