Inkhel hmuhnawmah Khatla TBL an vannei

Mizoram Super League Season 7-ah Thawhlehni zan khan inkhel hmuhnawm bik phochhuah a ni a, Khatla TBL chuan overtime vawi thumnaah Chanmari Vikings chu 99-94 in an hneh. Tun season MSL-a inkhel hmuhnawm bera chhal theih a ni.

MSL chu
MSL-ah hian team parukte hi vawi hnih ṭheuh a inkhel dawn a, tunah hian a thawh khatna an zo ta chiah. Zarkawt BCA leh Khatla TBL ten point kua ve ve an hmu a, Mission Veng Hotshots-in point riat hmuin pathumna an ni thung. Table hnuai lamah Tuikual South (7), Chanmari Vikings (7) leh Chawnpui BC (5) te an awm.

MSL7 hmawr bawk a ni tawh dawn a, Play In khel tur a chian hnaih avangin inkhel a nung sawt. Play In hi tun season aṭanga hman ṭan a ni a, table-a an dinhmunin awmzia thui tak a neih avangin league match inkhel zawng zawng hi a la pawimawh vek.

Hmuhnawm chu
Thawhlehni zan khan R. Dengṭhuama Hall-a inkhel entute an vannei a, ennawm hmuhnawm an thlir. TBL leh Vikings te ṭan phat aṭangin an inhnehtawk a, sang fal awm loa an inum chhoh ngar ngar a, a tawpah 76-76 niin overtime khelh a ngai.

Team pahnih tan American baller Levi Bradley Jr (TBL) leh Raymond Edward Miller Jr. (Vikings) te an khel ṭha dun a, Vikings-in chak theihna hun ṭha ngah zawk mah se an hun ṭha neih an bawhpelh.

Overtime vawi khatnaah point nga ve ve an hmu a, vawi hnihnaah Vikings-in point sarih hmuin chakpui turah an inngai. Mahse, TBL tan Levi Bradley-a'n ṭha zetin basket a nei a, 3-points a nih avangin chakah an ngai thung. Thil thlen dan hi sawi ho a nih hnuah Levi score hi point hnihah chhiar sak a ni a, replay thlir pawhin thutlukna dik a ni.

Overtime vawi thumnaah TBL tan Vanlalrinchhana a rawn vul a, a hun takah 3 points rawn neiin Khatlain hnehna an chang. Rinchhana hian point 28 zet a rawn nei a, chakna kawngah pawimawh hle.

Vawiin tlai dar 5:00 hian Khatla TBL-in MSV Hotshots an hmachhawn lehnghal dawn a, zanin dar 8:00-ah Chanmari Vikings-in hmahruaitu Zarkawt BCA an hmachhawn ang.