Mizoram chhunga football inelna sang ber Mizoram Premier League chu Covid-19 vanga kum hnih chhung khelh theih a nih loh hnuah kumin aṭangin khelh ṭan a ni leh dawn a, ṭan hma hauh aṭangin thawm a ring nghal.
MPL9 khel tur club pariat Aizawl FC, Chanmari FC, Chawnpui FC, Chhinga Veng FC, Electric Veng FC, FC Bethlehem, FC Venghnuai leh Mizoram Police FC aiawh ṭhukhawm chuan nimin khan inremna an siam. 
MPL club-in season khatah coach leh player tan nuai 10 aia tam a hmang theih dawn lo a, player pakhatin thla khatah Rs 15,000 aia tam a hlawh thei dawn lo. MPL club-ten thuchhuah an siamah inremna hi intihluihna awm loa ziah a nih thu an sawi.
Inremna awm chhan MPL club neih hi football thlirna aṭang chuan hlawhtlinna ropui tak ni mah se team enkawl hi thil namai a nih loh avangin phurrit hautakzet tihin a sawi theih bawk.

MPL awm theih nana Mizoram Football Association thawhpui Zonet leh MPL club-te tan Mizoram chhunga inelna sang ber buaipui hi football hmasawnna tura thil ṭha tih a ni a, a sum zawnga teh chuan hlawkna ni loin chatna a ni zawk.
MPL Club kalkhawmte chuan, "MPL-ah hian club tam zawk hian sponsorship leh donor/company lian thawhpui changtlung tak kan nei lo a. Khawtlang leh mimal inphalte thawh khawma harsa taka Mizoram football hmasawnna tur atana kal hram hram vek kan ni. Covid 19 vangin sum hmuhna tam takte pawh a lo tawp ta. Hei vang hian uluk taka hma lam hun ngaihtuah ngaiin MPL club-te chuan kan hria a ni," tiin thuchhuah an siam.
Thutlukna hi MPL hmasawn zel nan leh State League daih rei zawk leh tlo zawk Mizoramin a neih theihna tur a nih thu an ziak tel a, 2022-2023 season chhung bik atan a nih thu an ziak tel bawk.
Inremna chu 1.	Coach leh player hlawh atan Rs. 10 lakh (Nuai 10) aia tam hman loh tur a ni.

2.	Player pakhatin thla khatah Rs. 15,000 aia tam hlawhtir loh tur.
3.	Inter-State player leh foreign player lak loh tur a ni.
4.	Coach leh player hlawh bikah Mizoram Police FC chu an dinhmun a danglam avangin hriatthiam an ni ang.
5.	Sum kan hman dante hi endik theih tura vawn a ni ang a, chu chu MFA-in a audit ang. Thutiam bawhchhia kan awm a nih chuan a tul an tih angin MFA-in action a la ang.
Thil awm dan chu Mizoram hi India ram state rethei zinga mi a nih avangin sum tamna inelna lian buatsaih hi a harsa a, inelna lian leh ṭha nghet taka kal tur chuan sum chevel a tlem a ṭul. Hemi a nih avang hian MPL club-te pawhin thui tak thlirin thutlukna an siam a, player tawnhriat nei ṭha leh langsar tan chuan hriatthiam a har viau ang.

Chutihrualin MPL kal zel dan tur thlir chuan Mizoram mila thutlukna an siam hi a ṭha a, player chhuak thar ṭha zawk an awm theih phah ang a, footballer-te pawhin tualchhung football ringawt khelh tumin loin phai lama inkhelh tumin an rilru an tih paukhauh a ṭul dawn.
India rama football inelna sang ber Indian Super League-ah hian club pakhatin season khatah player hlawhah vaibelchhe 16.5 an hmang thei a, player hlawh hnemin nuai 100 chuangte an hlawh. Hemi a nih avangin football khelh hi eizawnna tlak a la ni reng dawn a, MPL chu player ṭha chherna hmun 'developmental league' tihin a sawi theih ang.
Thlirna dang lehah chuan club tin sum hman zat a inang thuak dawn a, foreigner leh state pawn player chhawr theih a nih loh avangin team tin an intluk dawn a, inelna nung tak thlir tur a awm phah ang.