Arsenal player thar Vieira

Vieira tih hming hi Arsenal ṭantute tan chuan a lunglen thlak khawp ang, an captain ropui ni ṭhin Patrick Vieira hi tunah chuan Premier League club Crystal Palace manager a ni tawh.

Gunners hian midfielder thar an nei, a hming chu 'Vieira' bawk a ni - a hmingpum erawh Fabio Vieira a ni thung. Portuguese midfielder hi Porto aṭangin pound maktaduai 34.2 sengin an lei fel, kum nga daih contract a ziak.

Arsenal manager Mikel Arteta chuan, "Talent nei ṭha tak player kan nei thei hi ka lawm. Fabio hi player themthiam leh fing tak a ni a, a bik takin goal nawr kawngah nasa takin min pui ngei ang," tiin a sawi.

Vieira chu...
Kum 22 mi chauh a la ni a, an ram Portugal senior team tan a la inlan lo. Nikum khan European Under-21 Championship-ah player of the tournament atan thlan a ni, a kum rualpui zingah pawh a ṭha duang pawl tih a chiang.

Arsenal technical director Edu chuan, "Fabio hi player theihna nei sang a ni a, khingpuite goal bulhnaiah a hlauhawm thei hle. Tun hun mai bakah nakin zela Arsenal tana player ṭangkai tur a ni," tiin a sawi.

Season hmasa Primeira Liga match 27 a khelh aṭangin goal ruk a khung, a ṭhiante khung tur vawi 14 a siamsak bawk. Tharum ngah tak ni lem lo mah se ball thiam leh midang tana ṭangkai ṭhin a nih avangin a lakah beisei an nei sang.

A phur
Club thar chungchang sawiin Vieira chuan, "Hun rei lote chhungin thil a thleng thut a ni ber mai. Attacking player ka ni a, hun remchang a awma goal khung leh assist neih chu fans lawmna a ni tih ka hria, an lawmna ang thlentir ngei ka tum," a ti.

Portuguese player hian tun hmain, a takah Mikel Arteta a la hmu ngai lo - phone aṭang erawh chuan an inbe tawh. Spanish manager hmathlir leh player a khelhtir ṭhin dan chu a thiam dan tur tak nia a hriat thu a sawi bawk.

Tlarhma pui turin Martin Odegaard, Bukayo Saka leh Emile Smith Rowe te an awmsa a, a tir aṭanga khelhna hmun nghet chan nghal chu a awlsam lo mai thei. A thiam takzet a nih erawh chuan, player ṭha bik tan chuan eng team-ah pawh hmun a awm zel.

Hmathlir
Tun nipui bazar chhungin Gunners hian player pathum - USA goalkeeper Matt Turner, Brazilian forward Marquinhos leh Vieira te an la ta a, striker Eddie Nketiah-a contract an pawtsei bawk. Tun hun bakah nakin hun lo kal tir thir chungin an bazar tih chu a hriat theih.

Arsenal technical director Edu chuan, "Kan ruahmannaah hian 100%-in kan chiang. Thil tum fel tak kan nei, chumi ti hlawhtling tur chuan kan kal mek. Team ti chak thei tura kan mamawh leh lak theih zawng kan melh," tiin a sawi.

North London club hian Manchester City striker Gabriel Jesus bakah, Leicester City midfielder Youri Tielemans te an rim mek, tun dinhmunah chuan anni pahnih hi tihtakzeta an ngaihven a ni a, hun inhawn chhungin tihfel hman an tum ang.