Inter Milan-ah Lukaku a kir dawn

Chelsea striker lungleng Romelu Lukaku chu a lunglentu lamah a kir leh dawn ta a, a club hlui Inter Milan chuan loan-a la let turin Premier League club hi inremna an neihpui.

Inter hian season khat chhung atan Lukaku hi loan-in an la let dawn a, Italian club hian an striker hlui hawh manah hian pound maktaduai 6.9 an seng dawn a, a khelh ṭhat dan a zira pek belh dan tur a awm bawk.

Season hmasa ṭan dawn khan Chelsea hian Serie A-a Inter champion puitu Lukaku hi man to takin an lei chhuak a, Belgian striker lei nan hian pound maktaduai 97.5 ngawt an seng.

Mahse, Lukaku-a'n Chelsea-ah beisei a phak lo a, Serie A lama kir châkin a lung a leng bawk - Inter-in an striker hlui hi an lo la duh reng bawk si a, loan-a la kir turin Blues hi inremna an neihpui ta.

Val lungleng
Lukaku-a'n Chelsea a zawm khan kum nga chhung atan contract a ziak a, mahse, a beisei angin Stamford Bridge hi nuam a ti lo - inelna hrang hrangah match 44 khelin goal 15 chiah a khung.

Premier League bikah match 26 khelin goal riat a khung a, a man zat nena teh chuan Belgian striker chet dan hi a ropui lo hle - nomawi chawi miah loin season an khar bawk.

Lukaku hian December thla khan Blues manager Thomas Tuchel hnuaia a khelh danah a lawm tawk loh thu a sawi chhuak a, Inter-a kir a hreh loh thu thlengin a sawi chhuak.

Mahse, a hnu lawkah Lukaku hian a thusawi avangin ngaihdam a dil zui a, khelmuala a thawnthu erawh a danglam lo - league-a a match hnuhnung 15-ah goal thum chiah a khung!

Hello Inzaghi
Lukaku hian kum khat lek Chelsea-ah hun a hmang chungin Inter-a kir a chak zek zek a, April 5 khan a agent Federico Pastorello pawh be rawn hmasa loin Inter coach Simone Inzaghi chu phone hmangin a bia niin an sawi!

Italian media-ten an tarlan dan chuan Lukaku hian April 5, zing dar 8:30-ah Inzaghi hi a kum 45 tlin lawmpui nan phone hmangin a bia a, "Inter-a lo kir turin eng nge ka tih ngai," tiin a zawt an ti.

Lukaku hian Inzaghi a biak hi Champions League quarterfinal first leg-a Real Madrid an hmachhawn hma chiah a ni a, Real lakah hian 3-1 in an tlawm zui - Karim Benzema chuan hattrick a siam a, Lukakau hian Blues tan chance duhawm lutuk a hlah thung.

Game pawimawh neih laiin Lukaku hian thil dang a ngaihtuah tel nasa tih a lang chhuak a, Blues fan-te an thinrim thar mai thei!

A tawpah chuan
Lukaku hian Chelsea-ah hian kar khatah £325,000 a hlawh mek a, sum ngah tawk lo Inter tan player pakhat tana hetiang zat hlawh sen hi a harsa ang tih a chiang.

Mahse, Belgian striker hian Inter-a kir a châk em avangin a hlawh tihhniam pawh a pawiti lo nia sawi a ni a, Serie A club-ah hian nasa takin a hlawh a tihhniam a rinawm.

Inter president Steven Zhang pawhin Lukaku hi lak kir ngei a duh avangin Chelsea nena an indawrnaah pawh a inrawlh ang hiala sawi a ni a, Blues neitu thar Todd Boehly pawhin Lukaku chhuah châk dan a hmuhin chelh chiah a ngai lo niin an sawi.

Hetihrual hian Lukaku-a'n loan-a Inter a zawm danah hian a ngheta a kir theihna dan a inziak tel lo nia sawi a ni - he thuziak i chhiar meuh chuan engkim a chiang tawh ang.

Inter an ṭang
Serie A club Inter-in Lukaku an la kir dawn a, hemi rual chiah hian coach Simone Inzaghi chu kum hnih atan contract thar an ziahpui - San Siro-ah 2024 thleng a cham ang.

Inzaghi hian euro maktaduai khatin a hlawh hnem sawt dawn nia sawi a ni a, season khatah €5mtd a hlawh dawn a, a contract neih sa aiin kum khatin a cham rei sawt dawn bawk.

Nerazzurri (Inter sawina) hian Juventus chhuahsantu Paulo Dybala an dawr mek bawk a, Argentine forward hi an lak theih chuan tlarhmaah Lukakau, Lautaro Martínez leh Dybala an ding ang a, an hmuhnawm khawp ang!

Hetihlai hian Inter thuneitu ṭhenkhat zingah Lukaku an lak tho chuan Dybala chungchanga ngaihtuahna sen ṭhat duh an awm nia sawi a ni a, he thu buatsaih lai hian thutlukna an la siam fel lo.

Chelsea a ruak!
London club hian Lukaku hma hian player langsar zingah Andreas Christensen leh Antonio Rudiger an lo chhuah tawh a, captain Cesar Azpilicueta leh left back Marcos Alonso chu chhuak thei dinhmunah a ding mek bawk.

Club neitu thar Boehly hnuaiah Chelsea hian player lakluh aiin chhuahtir an la ngah rih zawk a, lakluh tum lam thawm aiin chhuak thei dinhmuna dingte thawm a ri ring zawk bawk - Blues fans tan chanchin lawmawm hriat tur a tlem rih hle.

Hetihlai hian transfer bazar-a Chelsea hlawhtlin theih nana thawhhlawk tak, club director Marina Granovskaia chu a chhuak dawn bawk a, chutihrual chuan kum 2003-a Blues zawmtu hian tun nipui transfer-ah chuan London club hi a la pui dawn.

Chelsea neitu Boehly chuan sporting director hna a chelh lailawk dawn a, full time-a thawk tur an hmuh hunah an inthlak ang - Boehly hian London club-ah chairman ni turin Bruce Buck chu a thlak bawk a, Buck hi senior advisor angin a awm chhunzawm ang.