Champhaiah football a vul

Champhai District Football Association buatsaih Upa C. Keikhuma Memorial Inter Village Football Tournament chuan hlut a hlawh hle. Vawiin hian semifinal khelh a ni dawn a, Zotlang leh Zokhawthar te chhun dar 12:30-ah an inkhel ang a, chawhnu dar 2:30-ah Melbuk leh Hnahlan te an inkhel leh ang.

Ticket aṭanga pawisa hmuh aṭanga chhutin entu hi mi 2000 bawr velah a ngaih theih a, Chhangphut field an khat ṭhap zel. Inkhel entu satliah an ni lo a, mahni veng/khua ṭan tura chhuak an nih avangin an thawm pawh a ring hle.

Semifinal lut zingah Champhai khaw chhunga awmchhun chu Zotlang an ni a, ṭantu pawh an nei ṭha hle. Luangmual FC pawh lo enkawl tawh Saitea Tlau hoin champion rinkai an ni pha. Mahse, Zokhawthar hi anmahni ang bawka champion tum an ni.

Inkhel hnuhnung zawkah Mizoram team pawh enkawl tawh Lalsangzuala Hmar hoin Melbuk an inlan dawn a, an khingpui Hnahlan hi football thiam khua tiha chhal theih an ni ve bawk. Upa C. Keikhuma Memorial Inter Village Football khelh hma hian Rii & Hawla Football tihin inelna a awm ṭhin a, Hnahlan hi Champhai District inelnaah hian an champion tawh - inkhel hmuhnawm thlir tur a awm ang.

Quarterfinal
June 20, Thawhṭanni
Mualkawi 0 - 1 Zokhawthar
ZOK : Vanlalpuia 16'
Ruantlang 1 - 3 Melbuk
RUA : Vanlalawmpuia 30'(P)
MEL : Vanlallawmtluanga 10'(P); Lalsawmzela 74', 90+2'

June 21, Thawhlehni
Tuipui 0 - 3 Zotlang
ZOT : Zonunthara 11', 51', 64'
Hnahlan 2 - 1 Vengthlang
HNA : MS Dawngliana 4';
VL Remruata 78'
VEN : Stain Laltanzela 45'

Semifinal
Vawiin Inkhel Tur
Zotlang 12:30 PM Zokhawthar
Melbuk 2:30 PM Hnahlan