Hnehna nen Serena a lo kir

Tennis a khelh hnu-hnung ber aṭangin kum khat deuh thaw a liam tawh, a thiam erawh a la theihnghilh bik lo. Serena Williams chu tennis court-ah a lo kir leh ta a, doubles huangah inlanin hnehna an chang.

Thawhlehni zan khan Eastbourne International-ah Serena hi inlanin, a kawppui Ons Jabeur nen set an hloh hmasak hnuah Sara Sorribes Tormo leh Marie Bouzkova te ṭangdun chu 2-6, 6-3, 13-11 in an hneh.

Season hmasa Wim-bledon-ah khan Serena hi a match hmasa berah a chak lo, a ke hliam vangin a buai chhunzawm bawk. A hnu lamah chuan tun ṭum hi a inkhelh lehna hmasa ber a ni a, atan chanchin lawmawm a ni ngei ang.

Grand Slam vawi 23 champion tawh Serena chuan, "Ka ke a hliam a, chumi hnuah malpui na vangin ka buai chhunzawm leh. Hun rei tak chhung inkhelh loh hnuah match ka khel a, hnehna kan la chang nghal phei hi chu a lawmawm zual.

"A nihna takah chuan tennis hi ka khel chhun-zawm tawh lo mai ang tih pawh ka hlau hman hle. Tunah hian doubles kan khel chauh a la ni a, court chanve ang chauh chang ka la ni, chu tih rualin kan thlen chinah hian ka lawm," a ti.

American star hian major title 23 a lak zinga pasarih chu Wimbledon title a ni a, grass court inelna lianah hian kuminah tel ngei a tum. Grand Slam champion hnem ber Margaret Court-i (24 titles) record nihrual turin vawi khat champion a la mamawh.

Wimbledon hi tunkar chhungin qualifying khelh mek a ni - Zirtawpniah inkhel tur an pawt ang. July 27, Thawhṭanni aṭangin first round khelh ṭan a ni dawn. Serena hi wildcard pek a nih avangin main draw aṭangin inelna bul a ṭan thei dawn a ni.

Indona kaihhnawih vangin Russia leh Belarus player tel a rem dawn lo a, hei vang hian kumin Wimbledon hi world ranking siam a ni dawn lo. Champion pawhin ranking point an neih belh thei dawn chuang lo.