Zidane-a'n PSG a enkawl dawn lo

Paris Saint-Germain president Nasser Al-Khelaifi chuan Zinedine Zidane-a'n PSG manager hna a chelh loh tur thu a sawi a, French champion hian manager atan Nice boss Christophe Galtier an lalut hnai.

Al-Khelaifi chuan, "Manager atan chuan duh thlanna dang kan nei a, kan ngaihdan min ṭawmpui thei tura ṭha ber kan thlang," tiin Zidane an dawr loh thu a sawi. An hmachhawp chungchang sawi chhunzawmin PSG president chuan, "Player kan club hmangaih, club tana theihtawp chhuah leh chak duh player kan duh," tiin khawtual player a tam thei ang ber neih chhoh an tum thu a sawi bawk.

PSG enkawl tura sawi coach Galtier hi kum 55 mi a ni a, sulhnu ṭha tak a nei. Saint-Étienne a enkawl laiin Coupe de la Ligue nomawi a chawi tawh a, kum 2020-21 kha Lille chu Ligue 1-ah a champion pui. Season liam ta khan Nice a enkawl a, Coupe de France-ah pahnihna an ni bawk.