1966 World Cup champion - England team

Final-a West Germany nena bul ṭantute Gordon Banks (L): England number 1 keeper Banks hian Chesterfield aṭangin bul a ṭan a, July 1959 khan £7,000-in Leicester City a zawm. Banks hi FIFA Goalkeeper of the Year vawi ruk ni thei a ni a, February 12, 2019 khan kum 81 mi niin a thi.

George Cohen: Right back George Cohen hian Fulham tan a hun pum a hmang. Manchester United legend George Best-a'n a hma-chhawn tawh zinga right back ṭha ber tiin a sawi a, World cup champion ṭum manager Alf Ramsey-a'n England right back ṭha ber tiin a sawi. Cohen hi October 22, 1939 khan a piang a, kum 80 mi a ni tawh.

Ray Wilson (L): Left back Ray Wilson hian Huddersfield Town leh Everton-ah a vanglai hun a hmang a, Toffees hi FA Cup-ah a champion pui. December 17, 1934 khan Wilson hi a piang a, May 15, 2018 khan kum 83 mi niin a thi.

Jack Charlton (L): Centre back Jack Charlton hian Leeds United-ah a hun pum a hmang a, player bakah manager ropui tak a ni. Jack hi May 8, 1935 khan a piang a, July 10, 2020 khan a thi.

Bobby Moore (L): Defender ropui Bobby Moore hi England champion ṭuma captain a ni a, Pele-a'n defender a hmachhawn tawha ṭha ber tiin a chhal. Moore hi April 12, 1941 khan a piang a, a inzir chhuahna West Ham United-ah hming chherin February 24, 1993 khan kum 51 mi lek niin a thi.

Nobby Stiles: Defensive midfielder Nobby Stiles hi Manchester-ah May 18, 1942 khan a piang a, Manchester United academy aṭanga inzir chhuakin United senior team tan vawi 395 zet a inlan thei a ni. Alan Ball (L): Midfielder Alan Ball hi 1966 World Cup champion team-a naupang ber a ni a; May 12, 1945 khan Lancashire-ah piangin April 25, 2007 khan kum 61 mi niin a thi. Ball hi an in bul huan kang ṭhelh a tumna lamah lungphu chawlin a thi a, captain Moore hnung zuitu a ni. 

Martin Peters (L): Midfielder Martin Peters hi November 8, 1943 khan a piang a, December 21, 2019 khan a thi. Peters hian a ke pahnih a hmang thiam a, freekick specialist a nih bakah postion hrang hrangah a khel thei. A club khelhna hmasa ber West Ham tan goalkeeper position thlengin a khel kim vek a, Peters hi Spurs-in £200,000 in an lei a, Britain player zinga nuai hnih man kai hmasa ber a ni. 

Bobby Charlton: Attacking midfielder Bobby hi Manchester United-ah a inzir chhuak a, United chanchina mi pawimawh ber zinga mi a ni. Bobby hi October 11, 1937 khan a piang a, hun rei tak chhung Manchester United leh England tana goal khung tam ber  ni thei a ni a, 1968-a United-in European Cup an champion ṭumin a captain a, final-ah goal hnih a khung bawk.

Geoff Hurst: Striker Geoff Hurst hi England-in World Cup an champion ṭumin Wembley Stadium-ah West Germany lakah hattrick a siam a, English football-ah a chanchin a dai thei tawh lo. Captain Bobby Moore ang thoin West Ham legend a ni a; December 8, 1941 khan a piang a, football khelh ṭantirh lam hian first-class cricket match pawh a khel hman a ni.

Roger Hunt: Hurst-a kawppui Roger Hunt hi Liverpool legend a ni thung a, July 20, 1938 khan Lancashire-ah piangin Liverpool-ah kum 11 chhung awmin Bill Shankly hnuaiah player pawimawh a ni. Hunt hian Reds tan goal 286 zet khungin record a siam a, he record hi Ian Rush-a'n a rawn khum.

Ron Springett (L): Goalkeeper Springett hi July 22, 1935 khan a piang a, September 12, 2015 khan kum 80 mi niin a thi. Sheffield Wednesday-ah a hun tam zawk a hmang. Peter Bonetti (L): Goalkeeper Bonetti hi September 27, 1941 khan apiang a, April 12, 2020 khan kum 80 mi niin a thi. A chet dan danglam tak avangin 'Cat' tih hminglem pek a ni a, Chelsea-ah a hun tam zawk a hmang.

Jimmy Armfield (L): Right back Armfield hi September 21, 1935 khan a piang a, January 22, 2018 khan kum 82 mi niin a thi. Blackpool tan a hun pum a hmang a, football khelh a chawlsan hnuah Bolton Wanderers leh Leeds United enkawlin a hun hnuhnung lamah BBC Radio Five Live-ah pundit hna a thawk.

Gerry Byrne (L): Left back Byrne hi August 29, 1938 khan a piang a, November 28, 2015 khan kum 77 mi niin a thi. Liverpool tan a hun pum a hmang a, England tan vawi hnih chauh a inlan. Norman Hunter (L): Centre back Hunter hi October 29, 1943 khan a piang a, April 17, 2020 khan kum 76 mi niin a thi. Leeds United legend a ni a, a khelh dan rorum tak avangin "Bites Yer Legs" Hunter tih an vuah.

Ron Flowers: Midfielder Flowers hi July 28, 1934 khan a piang a, kum 85 mi a ni tawh. Wolverhampton Wanderers-ah a hun tam zawk a hmang a, Wolves hi First Division-ah (a hun laia league sang ber) vawi thum a champion pui.

Ian Callaghan: Midfielder Callaghan hi April 10, 1942 khan a piang a, kum 78 mi ni tawhin Liverpool legend a ni. Callaghan hian Bill Shankly hnuaiah Reds hi First Division-ah vawi nga a chmapion pui a ni.

Jimmy Greaves: Striker Greaves hi February 20, 1940 khan a piang a, kum 80 mi a ni tawh. Greaves hi a vanglaiin goal khung thei tak a ni a; England tan goal 44-a khung a, hattrick vawi ruk siamin Three Lions tana hattrick siam hnem ber a ni. Tottenham tan goal 266 khungin club top scorer a ni a, English top flight-ah goal 357 khungin record a ni a; First Division-ah ṭum ruk zet top scorer a ni bawk.

John Connelly (L): Outside forward Connelly hi July 18, 1938 khan a piang a, October 25, 2012 khan kum 74 mi niin a thi. Connelly hian First Division-ah Burnley leh Manchester United a champion pui a, 1966 World Cup champion team zingah thi pathumna niin a hma hian Bobby Moore leh Alan Ball te an thi.

Terry Paine: Forward Paine hi March 23, 1939 khan a piang a, kum 81 mi a ni tawh. Paine hian Southampton-ah a hun tam zawk a hmang a, England tan vawi 19 inlanah goal sarih a khung. George Eastham: Inside forward Eastham hi September 23, 1936 khan a piang a, kum 83 mi a ni tawh. Eastham hi Newcastle United, Arsenal leh Stoke City tan te a khel a, 1966 World Cup-ah squad-ah tel mah se a inlan lo.

Alf Ramsey (L), coach: Sir Alfred Ernest Ramsey hi January 22, 1920 khan a piang a, April 28, 1999 khan kum 79 mi niin a thi. Ramsey hian kum 1963 aṭangin 1974 thleng England hi a kaihruai a, 1966 World Cup a champion pui avangin 'Sir' nihna an pe. England hian Ramsey hnuaiah 1968 Euro-ah pathumna a ni a; 1970 World Cup leh 1972 Euro-ah quarterfinal an thleng ve ve bawk.