AIFF buaina chungchangah FIFA leh State FA hruaitute an inkawm

All India Football Federation (AIFF) buaina chingfel turin FIFA-in an aiawh mi pasarih an rawn tir a, nimin khan Football House, Delhi-ah State Association aiawh mi pasarihte nen an inkawm.

FIFA-AFC aiawh hi AFC general secretary Datuk Seri Windsor John-a'n a ho a, State FA aiawh mi pasarih zingah Mizoram Football Association secretary Lalnghinglova Hmar (Tetea Hmar) a tel.

Hrem hmabak AIFF?
AIFF inrelbawlnaah hian Supreme Court a inrawlh a, May 18, 2022 khan president Praful Patel leh AIFF Executive Committee te chu chawlhtir an ni. FIFA danah chuan ram khat association inrelbawlnaah hian football pawn lam inrawlh a phal lo a, Supreme Court a ni emaw sorkar thuneitute a ni emaw pawh ni se inrawlh a phal lo.

FIFA dan ang chuan AIFF inrelbawlnaah Supreme Court a inrawlh avangin India rama football thuneitu sang ber hi hrem theih a ni. FIFA hian Supreme Court-in AIFF enkawl lailawk tura a din Committee of Administrators (COA)pawh dan angin a pawm thei lo a, hei vang hian AIFF hi hrem hmabak a ni.

Hriatthiamna nen
FIFA hian duh ni se khawng takin dan a lekkawh thei a, mahse football tana ṭha ber tur a ngaihtuah. FIFA-AFC aiawhte hian June 21, Thawhlehni khan thil awm dan thlirin COE a kawm.

Inkawmnaah hian COA hotu ber Supreme Court judge hlui AR Dave, India football captain hlui Bhaskar Ganguly leh Dr SY Quraishi (Chief Election Commissioner of India hlui) te an tel vek.

Nimin khan FIFA-AFC aiawhte hian State FA aiawh mi pasarih Subrata Dutta (West Bengal), Shaji Prabhakaran (Delhi), K Satyanarayan (Karnataka), Vijay Bali (Punjab), Avijit Paul (Odisha), Mulrajsinh Chudasama (Gujarat) leh Lalnghinglova Hmar (Mizoram) te a kawm ve leh bawk.

State FA aiawhte hian Supreme Court-in a din COA rorelna chu an thlawp thu an sawi a, AIFF din thar lehna turin hna ṭha tak an thawk tih an hrilh bawk. Hemi a nih avang hian FIFA-AFC pawhin AIFF chungchangah zahngaihna a lantir a, inchinfelna hun a siamsak.

Hun rangkachak
FIFA-in AIFF tana inchinfel hun a pek hi tlangzarh ni lo mah se kumin October 11-30 chhunga India-in a thlen tur FIFA U-17 Women's World Cup hma chuan inchenfel a ṭul dawn tih chu a chiang.

AIFF-in FIFA hremna a pumpelh theih nan tun hi 'hun rangkachak' a ni a, India rama football thuneituten an hman ṭangkai a ṭul. Nimin khan State FA aiawhte hian FIFA-AFC aiawhte hnenah COA-in AIFF consitution a duan a, ṭha tawk lo laite an thlen.

State FA aiawhte hian FIFA-AFC aiawhte nena inbiakna an kalpui hma hian COA nen inbe pawpin AIFF constitution duan chhin hi sawi hona an nei tawh a, a khat tawkin meeting an nei reng bawk.

FIFA hian an hnuaia mi State FA aiawhte thutlukna hi a ngai pawimawh a, State FA rawtnate an pawmpui tur thu leh an en zui tur thu an sawi. COA thu hi FIFA chuan a ngaithla a, chutih rualin football pawn lam mi an nih avangin FIFA-in 'official takin' a pawmpui thei lo.

Beisei a awm
State FA hian FIFA dan hnuaia an duh anga AIFF consituttion an her rem a, COA-in a pawmsak a, Supreme court-in a nemngheh theih chuan constitution thar a awm thei ang.

AIFF-in constitution thar a neih chuan dan pangngaiin India rama football thuneitu sang ber a kal thei tawh ang. Amaherawhchu COA hian FIFA duh dan constitution an duang lo emaw, Supreme Court-in a pawm theih dan thar hi FIFA duh ang a nih loh chuan India-in hremna an tawk thei ang.

India-in hremna an tawk a nih chuan FIFA hnuai inelnaah Blue Tigers an tel thei dawn lo. Hei chauh a ni lo, a pawi ber tur chu kumin October thlaa neih tur FIFA U17 Women's World Cup pawh hmun dangah sawn a ni dawn.

Vawiin chawhma dar 10:00 hian State FA zawng zawng aiawhten online meeting a nei dawn. Chhunah State FA aiawh mi pasarih ten COA an hmu leh dawn a,

tlaiah FIFA-AFC aiawhte an kawm leh dawn. Vawiin hian inremna a awm thei a nih chuan harsastna tam zawk chu chinfel theih tura beisei a ni.

Thlirna Tawi
AIFF buaina
All India Football Federation (AIFF) hi sorkar inkaihhruaina National Sports Code zawm loa a kal avang leh, a hun taka inthlan an buatsaih loh avangin May 18, 2022 khan Supreme Court chuan an president Praful Patel chu a chawlhtir a, ani rual hian AIFF Executive Committee pawh chawlhtir an ni bawk.

Inthlanna buatsaih a nih hmaa AIFF enkawl lailawk turin Committee of Administrators (COA) a ruat a - COA hi AIFF inrelbawlnaa thuneitu sang ber a ni ta a ni.

Tute nge COA chu?
Supreme Court chuan Delhi Football Club aṭanga thubuai thehluh a ngaihtuah hnuin AIFF hruaitute hun chu tihtawp ṭha a ti a, a enkawltu turin (COA) a din.
COA hotu ber atan Supreme Court judge hlui AR Dave ruat a ni a, ani bakah hian India football captain hlui Bhaskar Ganguly leh Dr SY Quraishi (Chief Election Commissioner of India hlui) chu ruat an ni.

FIFA-AFC aiawhte
FIFA-AFC aiawha hotu lu ber chu AFC general secretary Datuk Seri Windsor John a ni. AFC aiawhin mi pathum deputy general secretary Vahid Kardany, head of South Asia unit Purushottam Kattel leh Central Asia unit senior manager Yogesh Desai te an ni.

FIFA aiawhin chief member associations officer Kenny Jean-Marie, director strategic projects Nodar Akhalkatsi leh regional office development manager for South Asia Prince Rufus te an tel bawk.

State FA aiawhte
State FA aiawh mi pasarihte chu Subrata Dutta (West Bengal), Shaji Prabhakaran (Delhi), K Satyanarayan (Karnataka), Vijay Bali (Punjab), Avijit Paul (Odisha), Mulrajsinh Chudasama (Gujarat) leh Lalnghinglova Hmar (Mizoram) te an ni.