Pliskova leh Bajin thawkdun dawn

Hmeichhe tennis world number 1 hlui Karolina Pliskova chuan season tharah hmasawn a tum, a coach atan Sascha Bajin a ruat. Bajin leh US Open champion tawh Naomi Osaka pawh lo enkawl tawhtu kha a ni.

World number 6 Pliskova hian Bajin bakah fitness coach Azuz Simcich te nena an thlalak chu social media-ah a tarlang a, thu awmze nei tak "Team Pliskova 2021" tih a ziak tel bawk.

Kum 36 mi Bajin hian player enkawl kawngah sulhnu a nei ṭha. Japanese nula Osaka khan US Open leh Australian Open nomawi a lakpui a, Serena Williams, Kristina Mladenovic leh Dayana Yastremska te pawh a lo kaihruai tawh ṭhin.

Pliskova hian season hmasa khan coach Dani Valverdu kaihhruaina hnuaiah a khel, Czech Republic star hian Brisbane-ah hlawhtlinna a chang a, September thla khan Rome khawpuiah final lut mah se Simona Halep a ngam lo.

A coach hmasa Valverdu nen hian November thla khan an inṭhen. Coach thar Bajin kaihhruaina hnuaiah Grand Slam nomawi hmasa ber chawi a beisei dawn, 2016 khan US Open final lut mah se a vanduai zawkah a ṭang.