Aizawl FC leh Mohun Bagan an chak ; Ram pumin RG Stadium inkhel tur a ngaihven
I League nomawi inchuh boruak sanna belhchhah turin Inrinni khan Aizawl FC leh Mohun Bagan ten khual-muala an khingpui Churchill Brothers leh Minerva Punjab an hneh ve ve.
Champion thei team pahnih hian point 30 hmu ve ve mah se Mariners hian an mualah AFC hi 3-2 a an hneh tawh avangin table-ah hmahruaitu an ni. April 22, Inrinni khian RG Stadium, Mualpuiah Kolkata club lian hi Mizo club-in an mikhual dawn a, champion tur zawnna inkhel hi sawi vul leh chuan a ngai lo a, sawi nep theih a ni lo bawk.
A hunah Kamo
Aizawl FC-in I League-ah vawi khat nan Goa-ah hnehna an chang a, Tilak Maidan-ah Churchill Brothers 3-1 in an hneh. Mizo club tan Bayi Kamo Stephane-a'n (7', 46') goal hnih a khung bakah R. Laldanmawia'n minute 85-naah chak nemnghehna goal a khung bawk.
Churchill Brothers-in minute 69-naah Anthony D’Souza hmangin goal khat an chhanglet a, Sialhawk tlangval goal khung hma zawng chu Aizawl FC nuamsain an awm lo.
Goa-ah Aizawl FC striker Kamo a tlangnel a, Ivorian forward goal khung pahnih hi 'striker finishing ṭha' tih atana mawi a ni. Mizo mipuiin Kamo hi ring zo ṭhin lo mah se Ivorian foward hi Mizo club tan a thawkrim a, I League-ah goal sarih khungin goal khung tama a tluk loh chu Shillong Lajong forward Aser Pierrick Dipanda Dicka (goal 10) chiah a ni.
Kamo goal khung pahnih hi Brandon-a thawhrah ve ve a ni. Danmawia'n a 'class' pho langin goal mawi danglam tak a thun a, I league-a a season hmasa berah game ṭhenkhata inlan lo chungin goal a khung ta.
Mariners chhantu Norde
I League champion tura rinkai Mohun Bagan-in Guru Nanak Stadium-ah mualneitu Minerva Punjab lakah inkhel an thunun thei lo a, flood light chian loh vanga inkhel chawlh a nih bawk avangin point hloh tura ngaih an ni hman.
Amaherawhchu, Mohun Bagan chhuanvawr Sony Norde-a'n minute 84-naah goal ṭha bik a khung a, chakna goal a ni zui bawk. Mariners hian I league-ah hma an hruai zui leh ta a, nomawi chawi turin Aizawla Aizawl FC an hneh a tawk.
Bagan an chau
Mohun Bagan hian April 9 khan Siliguri-ah East Bengal an hneh a, hemi hnu hian Shillong leh Ludhiana an tlawh leh tawh. Nizan khan Kolkata an thleng ang a, Nilaini zan dar 7:00-ah Maziya nen AFC Cup-ah an inhmachhawn ang.
Mariners hian April 22-a inkhel turin April 20-ah Mizoram an pan hman dawn chauh a, Aizawl FC erawh vawiin aṭangin Mariners hmachhawn turin an inpuahchah thei tawh thung ang.
Bagan striker Jeje Lalpekhlua chuan, "Kan hah ve ang reng, Shillong leh Ludhiana zin hi a hahthlak a, AFC Cup kan khel bawk avangin game kan khel tam a, practice-na hun mumal pawh kan nei thei lo. Minerva Punjab lakah kan vannei a, Aizawl-a I League final kan khel thei tur hi a lawmawm," tiin Vanglaini palai a hrilh.
Mizo club beiseina
Aizawl FC coach Khalid Jamil chuan, "Player zawng zawng an thawkrim a, team angin kan thawkrim bawk," tiin an thawhrimna vanga beiseina an neih thu a sawi.
Mizo club hian an zinna hmun apiangah Mizo mipui hnen aṭangin ṭawiawmna ṭha tak an nei zel a, April 22-ah a ṭha lehzual ang.
Aizawl FC hian Mohun Bagan hi goal hnih leh a aia tama an hneh chuan RG Stadium-ah an champion thei dawn. Goal khata an chak chuan nomawi chawi turin match hnuhnung bera Shillong Lajong draw a tawk thung ang.
Chutihrualin AFC hi an chak loh chuan match khat khelh tur la awm mah se Mohun Bagan hi an champion dawn. An inhnehtawk a nih pawhin Mizo club tan tih theih a tlem tawh - Bagan hian match hnuhnung berah Chennai City la tum dawn a, an hneh chuan an champion dawn tho a ni..
Inkhel Result
Churchill Brothers 1 - 3 Aizawl FC
CCB : Anthony D’Souza 69'
AFC : Kamo Bayi Stephen 7', 46'; Laldanmawia Ralte 85'
Shillong Lajong 0 - 2 Bengaluru
BFC : Sunil Chhetri 26'; Harmanjot Singh Khabra 49'
Minerva Punjab 0 - 1 Mohun Bagan
MMB : Sony Norde 84'