National Sub Jr C'ship Uttar Pradesh Vs Mizoram
Sub Junior National Football Championship-ah Mizoram-in tukin zing dar 7:15 hian Uttar Pradesh an hmachhawn ang. Inelna neihna hmun hi Calicut, Kerala niin inkhelhna tur hi Municipal Corporation Stadium a ni.
Inelna hi April 15, Inrinni khan khelh ṭan a ni a, match hmasa berah Mizoram khingpui tur Uttar Pradesh hi Madhya Pradesh nen goal awm loin an inhnehtawk. Group A inkhel dangah Odisha chuan Kerala 3 - 2 in an hneh a, group khatah panga awmin pahnihin semifinal an lut ang.
Mizoram hian Inrinni zing dar 6:00 khan Calicut (Kozhikode) an thleng a, khua a lum avangin zing leh tlaiah chauh inkhel a awm. Vawiin tlai dar 4:15 hian Madhya Pradesh leh Odisha te an inkhel bawk ang. Sub Junior National Football final round-ah team 10 an tel a, Group B-ah West Bengal, Goa, Tamilnadu, Delhi leh Meghalaya te an awm ve bawk.
Mizoram manager Zaihmingthanga chuan, "Naupang an dam ṭha a, Inrinni zing khan kan thleng a, tlai lamah training kan nei nghal. Kan hlauhthawn chu kan thlen tlai deuh avangin ngai an awh hman lo palh ang tih hi a ni a, hei bakah inelna a kan ball pet tur hi training-naa kan hman nen a inang lo a, kan khelhna hmun tur hi natural grass a ni bawk," tiin Vanglaini palai a hrilh.
Zaitea chuan sawi chhunzawm, "Beiseina sang tak kan nei a, Mizo mipuite ṭawngṭaipuina ngen. Theihtawp chhuahin kan khel ang," tiin a sawi. Mizoram hi manager Zaitea bakah coach Vanromawia leh assistant coach H. Lalnunzira ten an ho a ni.
Fixtures - Group A
April 15, Inrinni
Madhya Pradesh 0 - 0 Uttar Pradesh
Odisha 3 - 2 Kerala
April 17, Thawhṭanni
7:15 AM Uttar Pradesh Vs Mizoram
4:15 PM Madhya Pradesh Vs Odisha
April 19, Nilaini
7:15 AM Mizoram Vs Madhya Pradesh
4:15 PM Kerala Vs Uttar Pradesh
April 21, Zirtawpni
7:15 AM Odisha Vs Mizoram
4:15 PM Kerala Vs Madhya Pradesh
April 23, Pathianni
7:15 AM Uttar Pradesh Vs Odisha
4:15 PM Mizoram Vs Kerala
Semifinal
April 26, Nilaini
Win Group A Vs Run Group B
Win Group B Vs Run Group A
Final
April 28, Zirtawpni
Win Semifinal 1 Vs Win Semifinal 2