Dan theih loh Kane leh Spurs

Tottenham chuan kum 1967 hnua a vawi khat nan top flight-ah a zawnin match sarih chhung hnehna an chang leh ta. Spurs hian Inrinni zan khan an mikhual Bournemouth 4-0 in an sawp a - Premier League nomawi an chuhpui Chelsea an um zel.

White Hart Lane-a inkhelah Spurs hian minute thum chhung lekin Bournemouth beiseina an tih mih sak! Minute 16-naah Mousa Dembele chuan Christian Eriksen-a corner pet aṭanga ball lo kal a khung a, goal hmahruai luh aṭanga minute thum hnuah South Korea international Son Heung-min chuan Harry Kane hnen aṭanga a ball hmuh chu chak taka la lutin a khung zui bawk - inkhel a zo derah a ngaih theih.

Spurs-in an la duh tawk lo, second half minute thumna lekah Kane chuan defender a bum hnuah an goal thumna a khung, hun tawp dawna Vincent Janssen goal khung chu Spurs chak nemnghehna leh Bournemouth mualpho tizualtu a ni tawh.

England international hian tun season league match bikah goal 20 a khung tawh. Alan Shearer, Ruud van Nistelrooy leh Thierry Henry te hnung zuiin Kane hi a zawna Premier League season thum chhung goal 20 khung tling thei a ni chiah - kum 23-a upa chauh a la ni.

Tottenham hian tun season-ah an khelmual an hmangthiam hle, goal 43 khungin an lamah goal riat chiah a lut. EPL club zingah mahni khelmuala goal khung hnem leh chhuah tlem ber an ni.

Spurs hian 2015-16 season khan point 70 hmuin pathumna ni chungin season an khar, tun season-ah erawh inkhelh hmabak paruk la nei chungin point 71 an hmu tawh; league hmahruaitu Chelsea nen an inkarah point li chiah a awm - Blues hian nizanah Manchester United an lenchilh a, an inthlauhna hi a la danglam thei.

Inkhel dangah Everton chuan Burnley 3-1 in an hneh ve bawk. Ronald Koeman-a naute hian Goodison Park-ah a zawna league match riat an chak zawn niah hian Phil Jagielka leh Romelu Lukaku ten goal an khung bakah Burnley defender Ben Mee-a'n an mahni lamah a ti lut.

Premier League top scorer nilai Lukaku (24 goals) hian an mahni khelmual bikah hian match kua chu a zawnin goal a khung tawh a, league match 33 an khelh aṭanga point 57 hmuh puiin pangana an ni rih.

Inkhel Results
Tottenham Hotspur 4 - 0 AFC Bournemouth
Crystal Palace 2 - 2 Leicester City
Everton 3 - 1 Burnley
Stoke City 3 - 1 Hull City
Sunderland 2 - 2 West Ham United
Watford 1 - 0 Swansea City
Southampton 0 - 3 Manchester City