Mission Veng Vikings an chak nawn
Mizoram Super League-a rematch hmasa berah Mission Veng Vikings-in Mizo hlangin Zarkawt Serpents 57-53 in an hneh a, semifinal kawng an inhawng zau sawt. Vikings hian vawi li khelhah point ruk an hmu a, an point zat ang chiah hmutu Khatla TBL an sawp avangin table-ah pahnihna an ni.
Rematch chu
Vikings-in Khatla TBL hneh theihna kawngah American player Ronald March leh India aiawha khel pha Rikin Pethani te chhawr ṭangkai mah se Zarkawt Serpents nen erawh player ngaia khelh tur a nih avangin hman theih an ni lo.
Mizo hlangin Vikings an inlan a, Serpents erawhin an inhmachhawn hmasak ang bawkin Sahil Sharma leh Kanipi Shiv Kumar te nei mah se captain Hmingthanmawia chu bench-ah an ṭhuttir nachungin hliam vangin an chhawr lui ngam lo.
Vikings an puitling
Mission Vengin bul an ṭan ṭha a, third quarter zawhah 46-38 a ni. Amaherawhchu quarter tawp berah Serpents an che ṭha a, hma pawh hruai hman hial mah se a tawpah tawnhriat player ngah zawk Vikings an chungnung.
Vikings chak nan tawnhriat ngah player Michael F. Lalawmpuia, Moses Zoremmawia leh Lalrina Renthlei te an ṭangkai a, hun tawpah chak duhna thinlung ngah zawkin hnehna an chang.
MSL3 a ngaihnawm
League hmahruaitu Zarkawt BCA-in semifinal an lut tawh a, MSL3 ngaihnawmna tak erawh pahnihna dinhmun luah lailawktu Mission Veng Vikings pawh hi relegate thei an la ni!
MSL-ah head to head en a ni a, Vikings hian an elpui bera ngaih Chanmari Hollow an hneh loh avangin an dinhmun hi a ṭha loah ngaih a ni. Amaherawhchu, tunah chuan Mission Veng hian Khatla TBL an sawp avangin champion lai TBL hi tla thei dinhmunah an ding ve tho a, Vikings leh Khatla TBL la hmachhawn tur Tuikual South hi ngaihṭha taka awm thei an la ni lo bawk.
MSL khelh hmabak
April 20, Ningani
7:00PM Tuikual South BC Vs Mission Veng Viking
April 21, Zirtawpni
7:00PM Zarkawt BCA Vs Zarkawt Serpents
April 27, Ningani
7:00PM Khatla TBL Vs Tuikual South BC
April 28, Zirtawpni
7:00PM Zarkawt Serpents Vs Chanmari Hollow