Hlawh uchuaka Sanchez chelh tum lo Wenger

Arsenal manager Arsene Wenger chuan a player chhuanvawr Alexis Sanchez chu hlawh uchuak tak hlawh tura chelh tumna a neih loh thu a sawi. Chile international hi season thar tawpah a contract a zo tawh dawn a, Europe-a club langsar tak tak bakah player hlawha inseng nasa Chinese Super League club ṭhenkhat nen sawizawm mek an ni.

Mahse, Wenger chuan a player chu hlawh uchuak tak hlawhtir ai chuan chhuahtir mai a thlan thu sawiin, "Club sum dinhmun kan ngaihchan a ṭul a, squad pumpui hlawh kan ngaihtuah tel a ṭul bawk. Ngaihdan chi hrang hrang a awm thei a, mi ṭhenkhat chuan ka player hi a hlawh duh zat pe mai turin min hrilh. Mahse, club-in kalphung nghet sa kan nei a, chu chu kan zah tur a ni. Chuti a nih loh chuan club a talbuai mai ang," tiin a sawi.

Wenger-a'n Sanchez chelh lam aia a sawi langsar tak pakhat chu a player chu China lama kal ai chuan England-a a khelh chhunzawm zel a rin thu a sawi hi a ni - Gunners fans tan hriat nuam a ni lo tawp ang.

French manager chuan, "Club leh player chuan kan tana ṭha turin thutlukna kan siam zel a ṭul. Player-in a ngaihtuah hmasak ber tur chu a tana

ṭha tura thutlukna siam a ni a, China-a sum tam tak hlawh tura kal ringawt hi awmze nei lo a ni. England-ah hian sum a tam tho a, sum tam tak hlawh tho chunga inelna san em em na hmuna khelh hi a ṭha a ni. Chuvangin Alexis hi China-ah a kal lo ang," a ti a, club danga a chhuah loh tur thu erawh a sawi tel lo.

Kum 28-a upa Sanchez hian tun season-ah Premier League goal 18 khung tawhin assist pawh vawi kua ngawt a nei a, hetichung hian Premier League table-ah a club hi parukna dinhmun bak a luahpui thei rih lo. Arsenal hian zanin dar 12:30-ah Middlesbrough chu league match khel turin an lenchilh ang.

Gunners hian league match 30 khelh tawh aṭangin point 54 an hmu a, table-ah pasarihna an ni mek. Season thara Champions League khelh tum club tan point khat pawh hloh a thiang tawh lo.