Barca-in Real um zel

La Liga nomawi chawi tur a la chiang lo. Inrinni zan inkhelah Real Madrid chuan hun tawp dawna Isco goal hmangin Sporting Gijon 3-2 in an hneh hram a, nomawi kawltu Barcelona chuan Lionel Messi goal hnih hmangin Real Sociedad 3-2 in an hneh ve bawk.

Zinedine Zidane-a naute hian La Liga match 31 an khelh aṭanga point 75 hmuin league table-ah hma an hruai chhunzawm zel a, an mahni aia match khata khel tam zawk Barcelona chuan point 72 an hmu tawh thung. April 22 zanah Spanish club ropui pahnih hian El Clasico an khel dawn.

Real vannei

Champions League-a Bayern Munich hnehtu team aṭangin Zidane-a'n player pakua ngawt a siksawi a, keeper Keylor Navas, Cristiano Ronaldo, Gareth Bale leh Karim Benzema te chu Gijon hmachhawn tur squad-ah telh an ni lo.

Relegation zone aṭanga point nga chuaha him Gijon-in beisei loh takin minute 14-na lekah Duje Cop hmangin hma an hruai, mahse an lawm chung a rei lo - Real hian minute thum liam hnuah Isco hmangin an sut nghal.

Gijon goal hmasa zawk siamsaktu Mikel Vesga chuan second half minute ngana lekah an hmahruai vawi hnihna turin a tauh luh chu minute kaw hnuah Alvaro Morata-a'n a lu hmang bawkin a sut leh. Point khat an insem ngei dawnin a lang hman mah se minute 90-naah Real vanneihna a inher chhuak - Isco bawkin yard 20-a hla aṭangin an chakna goal a khung.

Real Madrid hian tun season league match bikah si an phurh zet hnu leh chak lo zawk tura an lan hnuah point 10 zet an sual chhuak tawh a, kum 2012 hnua a vawi khat nan La Liga nomawi an beiseina an chhi nung zel.

Real Madrid manager Zidane chuan, "Football-ah chuan vanneih a awm thei lo, minute 90 chhungin rim takin kan thawk, a tawpah a rah kan hmu a ni mai. Hun a tawp rak thlenga beih hi Real Madrid zia a ni a, kan thisenah chu chu a awm. Player langsar ṭhenkhat chawlhtir kha duhthlanna harsa tak a ni, chutihrualin kan ṭhatna tur a ni zawk," tiin a sawi.

European champion vawi 11 ni tawh Real Madrid hian kar hmasa khan Bayern Munich chu Allianz Arena-ah 2-1 in an va luhchhuah tawh a, Thawhlehni zanah quarterfinal second leg khel turin German champion hi an lo mikhual ve leh thung dawn a ni.

Barca tan Messi

Luis Enrique-a'n awlsam takin Real Madrid lakah league nomawi hloh a tum lo. Champions League khela Turin-a zin chau tan pawh hahchawlhna hun a awm lo a, hrem vanga inlan thei lo Neymar tih loh player langsar rualin Real Sociedad an hmachhawn. Captain Andres Iniesta aiah Andre Gomes chu inkhel bul ṭan tir a ni thung.

Barcelona-in Messi goal hnih hmangin hma hruai nghal mah se France international defender Samuel Umtiti-a'n an lama a tihluh avangin Real Sociedad-in beiseina an neih phah.

Valencia aṭanga Barcelona zawmtu Paco Alcacer-a'n Catalan club tan thun belh mah se Xabi Prieto hmangin Sociedad-in an chhang let a, goal nga hi first half-a lut vek a ni. Second half-ah goal dang a lut tawh lo a, Barcelona 3-2 in an chak.

Kum 29-a upa Messi hian Catalan club tan inelna hrang hrangah match 575 a khelh aṭangin goal 498 a khung tawh a, tun season La Liga bikah match 28 a khelh aṭangin goal 29 a khung tawh bawk.

Iniesta chungchang sawiin Barcelona coach Enrique chuan, "Iniesta hi player ṭha leh danglam bik a ni a, ani ang player hi chu khawvel hmun dangah an awm lo. Mahse, kum 32-a upa a ni tawh a, a chang chuan hahchawlh a mamawh ve bawk," a ti.

Barclona hian chawlhkar hautak an hmang dawn, Inrinni zana El Clasico an khelh hmain Nilaini zanah Champions League quarterfinal second leg khel turin Juventus an mikhual ang - Barca hi Italy-ah si thum faiia an tlawm tawh avangin an hna a hutak dawn hle.

Atletico chak

Atletico Madrid-in league nomawi beisei ngam tawh lo mah se season thara Champions League khel zui turin an dinhmun an siamṭha zel. Diego Simeone naute hian Yannick Carrasco goal hnih bakah Filipe Luis-a goal khat hmangin an mikhual Osasuna chu 3-0 in an sawp.

Atletico hian league match 32 khelh aṭangin point 65 an hmu a, table-ah pathumna an ni. Thawhlehni zanah Champions League quarterfinal thawh hnihna khel turin Leicester City an lenchilh ang - Foxes lakah hian Antoine Griezmann-a goal khat hmangin hnehna an lo chang tawh.