Inter leh Milan inhnehtawk
Inrinni zan Serie A inkhel ngaihven hlawhah Inter Milan leh AC Milan te 2-2 in an inhnehtawk a, hmahruaitu Juventus chuan khualmualah Pescara chu si hnih faiin an hneh thung.
Season thara Europe-a inlan tum pahnih inkhelah Inter an dinhmun a ṭha hmasa zawk. Roberto Gagliardini-a through ball chu Antonio Candreva-a'n goal-ah a chantir bakah Mauro Icardi chuan Ivan Perisic cross khungin 2-0 in hma an hruai.
Chawlhlawk laiin Milan-in si hnih an phurh tawh avangin Inter hi chak tlang tura ngaih an ni. Mahse, minute 83-naah Alessio Romagnoli-a'n goal khungin Milan beiseina a siamsak a, Cristian Zapata chuan injury time minute saihnaah an siphurh sutna goal a khung ve bawk.
Milan goal hnuhnung zawk hi Inter defender Gary Medel chuan Zapata ball pet hi a lo pet chhuak hmanin a lang, mahse goalline technology hmangin goalline a pel ngei tih a lan avangin Chinese sumdawng hausa hnuaia an luh pumhlum hnua an match hmasa berah Milan-in point khat an hlawh chhuak hram.
Juve an tlo
Juventus chuan a zawna league nomawi vawi ruk chawi turin an dinhmun an sawhnghet. Gonzalo Higuain-a'n first half-ah goal hnih khungin Pescara 2-0 in an hneh.
Argentina international striker Higuain hian tun season league match bikah ṭum riat ngawt goal hnih a khungna a ni a, a vaiin goal 23 a khung tling tawh.
Inkhel dangah league table-a pahnihna AS Roma chu Atalanta nen 1-1 in an inhnehtawk. Roma hian point hnih an hloh avangin point 80 hmutu Juventus an phak lohna chu point riat zet a ni tawh - league match ruk bak khelh tur an nei tawh lo.