Cherries hmaah Leicester an mualpho

Premier League-ah champion hre hma mah ila a ngaihnawmna a danglam phah lo a, season thara Champions League khelh tum inel leh relegation zone battle chu hmuhnawm an tling. 

"Football-ah thleng thei lo a awm lo," tiin an sawi  ṭhin a, season tawp lam inkhel hi he thu awmsa dikna nem nghettu a ni ṭhin - Pathianni Zan Premier League-ah pawh kan hmu. Bournemouth chuan season thara Champions League khelh tum Leicester City chu 4-1 ngawtin an sawp a, inham tan an tumna lamah thawk an la ngam ṭan ve leh ta. 

Wolverhampton Wanderers chuan 3-0 a Everton sawpin Champions League an hnaih ve leh ta sawt bawk a, Aston Villa-in beiseina thar insiam turin Crystal Palace chu 2-0 in an hneh bawk. 

Leicester-in top four-a an dinhmun sawh ngheh nan chak an mamawh tih an hria a, Jamie Vardy chuan minute 23-na lekah goal hmahruai a rawn khung nghal. Mahse, Foxes hlim chhung a rei lo. 

Minute 66-naah goalkeeper Kasper Schmeichel chuan a team-mate Wilfred Ndidi a pet per a, a per lehlam nang hman tum Ndidi chuan Callum Wilson a ti tlu - penalty a chawi zui.  Junior Stanislas chuan penalty hi goal-ah a chantir a, a bul ṭanna chauh a ni. Dominic Solanke chuan minute hnih hnu lawkah an goal hnihna a rawn khung a, Leicester hi player pakhatin an tlem phah zui. Bournemouth-in an goal khung an lawm laiin Foxes defender Caglar Soyuncu chuan ṭul loah Wilson a pet tlu a, referee-in red card pe zuiin a hnawt chhuak. 

Soyuncu hnawhchhuah a nih hnuah Leicester an talbuai zual a, an tho leh tawh lo. Stanislas-a shot naran tak nia lang chu Jonny Evans chuan an lamah a dang per lut a, 3-1 a ni. Leicester an insiamṭha lo. An throw-in aṭanga ball kalsual chu Solanke-a'n a nang fuh a, Cherries a pan hnua beisei anga la khel chhuak lo Liverpool striker hlui hian footwork mawi zet pholangin a goal hnihna a khung a, 4-1 in an chak. 

Cherries-in hnehna an chan avangin 17-na Watford chu point thum chauhin an phak lo tawh a, match thum khelh tur an la neihah Premier League inhamtan theih an la beisei ang. Hetihlai hian hliam vanga lakchhuah ngai defender pawimawh Nathan Ake chu Cherries hian season tawp thleng an chhawr thei lo ang. 

Leicester erawh nizan inkhela Manchester United an chak chuan top four aṭanga petchhuah an ni ang. Foxes coach Brendan Rodgers chuan, "Kan phu tawk dinhmunah season kan khar ang," a ti a, a naute khelh danah a lawm lo. 

Premier League-a an match hnuhnung pahnihah Wolves-in an elpui Arsenal leh Sheffield United an ngam lo a, Everton lakah tawlhthluk nawn an tum tawh lo - first half hun pek belhah Lucas Digne chu Daniel Podence laka a foul avangin penalty an hlawh chhuak.

Raul Jimenez chuan penalty hi chhawr ṭangkaiin goal hmahruai a rawn khung a, kum 29 mi striker-in tun season Premier League-a goal 16 a khungna chiah a ni a, inelna hrang hrangah match 50 khelin goal 25-a khung tawh bawk.

Wolves tan hian Leander Dendoncker chuan second half ṭan aṭanga minute khatnaah an goal hnihna a rawn khung a, Diogo Jota chuan minute 74-naah a hmawr bawkin an goal thumna a khung - Champions League an beisei ve zel e. 

Premier League khelh chhunzawm leh a nih khan Everton-in Europa League khelh beiseina an la nei a, mahse player a thlan dan enin coach Carlo Ancelotti chuan season thar atana inbuatsaih nan season tawp lam hi a hmang zawk niin a lang. 

Aston Villa-in season tharah Premier League la khelh ve zel an duh tih an pholang a, an mikhual Crystal Palace chu 2-0 in an hneh - Egyptian forward Trezeguet chuan goal hnih a khung. 

Villa Park-a inkhelah mikhual team Palace hian Mamadou Sakho hmangin goal hmahruai an khung emaw an inti hman a, mahse rei tak ennawn a nih hnuah handball vanga pawm a ni lo - a dar hmangin a ti goal niin a lang zawk. 

Second half ṭan tirah Villa hi Jack Grealish laka Patrick van Aanholt chet dan avangin penalty pek leh an ni a, hei pawh hi VAR hmanga ennawn a nih hnuah sut leh a ni! Mahse, minute 59-naah Trezeguet bawk rawn lang lehin a goal hnihna a rawn khung a, 2-0 in an chak. 

Villa hi table-ah 19-na an la ni a, 17-na Watford chu match thum khelh tur la awmah point liin an phak lo mek. Villa boss Dean Smith chuan, "Kan point mamawh ang zat kan la nei lo a, mahse petchhuah kan la ni bik lo," tiin beisei an la neih thu a sawi.