Inter Village Football - A hun a thleng ta

Team 204 telna LBS Suzuki All Mizoram Inter Village Football Tournament chu vawiin aṭangin khelh ṭan a ni dawn a, ni hmasa berah hian group pathumah match 11 a awm nghal ang. Mizoram district 11 aṭangin team an chhuak vek a, sum faia pawisa dawn tur lam aiin 'Mizoram Champion' nih chu a hlu ber tur a ni.

MFA buatsaih inelna hi ground panga Lammual, RG Stadium, MZU Ground, MFA Ground (Sairang) leh Lengpui MSSC Sports Complex-ah te khelh a ni dawn. First round-ah Local Council leh Inter Village team-te an insut theih loh avangin sawisel hlawh deuh mah se seeded hranpa an awm lo a, group awmna vannei leh vanduai kar a hla a ang.

A ruh no no chhuakah
Inter Village Football hi knockout football a ni a, a chak lo apiang an tla zel dawn. First round aṭanga last 16 thleng extra time a awm dawn lo a, minute 90 khelh zawhah penalty shootout a ni nghal dawn.

Chutihrualin inkhelhna tur hmun hi artificial turf a nih dawn avangin team chhe zawk tan vanneih a harsa dawn a, tun hma angin chirh diak puihna nena goal venhim ang kha a theih dawn tawh loh. Amaherawhchu inkhelhna tur hmun hi Lengpui, Sairang leh MZU Ground te a nih daih avangin motor ruih vanga khel hlei thei lo thlengin sawi tur an awm ang.

Substitution 5
Team khatah hian player 25 an awm thei a, team official panga ziah luh theih a ni bawk. Amaherawhchu inkhelh niah player 20 leh team official pathum chauh technical area-ah a awm theih thung.

Inter Village football-ah hian FIFA dan thar ber hman a ni a, player panga a thlak theih dawn. Subsititution hi ṭum thum siam theih a ni a, half time laia substitution siam erawh ṭum thumah hian chhiar tel a ni lo.

Quarterfinal aṭangin extra time a awm dawn a, extra time a thleng a nih chuan substitution pakhat dang a siam belh leh theih ang.

A hautak
Inter Village-a inelna hmachhawn hi thil awlsam a ni lo a, khawtlang ṭanrual a ngai hle. Aizawl khaw pawn tan chuan zinna ringawt pawh hi er tham a tling a, ei leh in tur nena chhut tel phei chuan a hautak lehzual.

Tun ṭum inelnaah hian a harsatna belhchhah turin Lengpui leh Sairangah te khelh a ni a, inelna hmachhawn tura Aizawla thlengten Lengpui leh Sairang pan nan sum ṭhahnem tak an sen belh leh ang.

Thingtlang khaw ṭhahnem tak inelna hmachhawn turin an inhlawh a, khua/vengah mi inphalten sum leh pai an thawh khawm bawk. Hetiang harsatna kara team 204 tehmeuhin inelna an hmachhawn ngam hi football ropuina a lang a, inelna pawhin ngaihhlut a hlawh.

Tunah chuan a sawi 'hot'-na hun a zo ta, a khelh tak tak hun a in ṭan ta. Vawiin bikah RG Stadium, MFA Ground leh Lengpui SMC-ah inkhel thlir tur a awm ang.