Cardiff City leh Bale an indawr

Championship club Cardiff City chuan an khaw tlangval Gareth Bale chu lakluh ngei an tum a, Bale-a aiawhte nen inbiakna an kalpui mek.

Kum 32 mi forward hian Real Madrid a chhuahsan hnuah club nei loin hun a hmang mek a, a duhna lam club pan turin a zalen - Bale-a aiawhte hian Cardiff chairman Mehmet Dalman chu inbiakna an neihpui a ni.

Hetihrual hian Bale hi a pian leh seilenna khaw club-ah hian a kal ngei dawn tihna a ni lo a, Bale-a agent te hian club engemaw zat indawrna an neihpui.

Welsh forward hi Major League Soccer leh a club hlui Tottenham Hotspur nen pawh sawizawm a ni a, kumin World Cup-a Wales jersey haa a inlan tur chu thupui berah a nei mek - hei hian a club thlan thlengin a nghawng ang.

Cardiff hian Football Association of Wales nen training ground an inṭawm a, hetiang a nih chuan Bale hi Wales medical leh fitness staff-te nen an thawk ho reng thei dawn.

Chu chauh a ni lo - Cardiff hi a pan chuan a khelh duhna match thlang turin zalenna a nei thei dawn a, he khawpuiah hian a chhungte an la cheng mek bawk.

Wales captain Bale hian Real Madrid-ah khan kar khatah £600,000 (Rs. 5,74,41,773) a hlawh a, hei hi tuna Cardiff squad pumpui kar khat hlawh ai pawhin a tam - mahse, Bale hian World Cup a ngaih pawimawh avangin hlawhah a buai lo tih thlengin an sawi!