United hel lai Nkunku a chhuak dawn lo

Manchester United leh Chelsea ten lakluh an tum nia an sawi, RB Leipzig striker Christopher Nkunku chuan chona thar hmachhawn aiin a club tana khelh chhunzawm a thlang a, June 2026 thleng atan contract thar a ziak.

Kum 24 mi striker hian season hman zawh takah khan inelna hrang hrangah match 52 khelin goal 35 ngawt a khung a, assist vawi 19 a nei bawk - European club lian ho chil a tiput hle.

Mahse, Nkunku-a'n a club-ah rinawm a thlang a, French striker chuan, "DFB-Pokal-a hlawhtlinna kan chan hnu khan he hmuna ka hna ka la zo lo tih a lang chiang a, nomawi ka duh belh a ni.

"Club-in min chelh tuma hma an lak danah ka lawm em em a, ka chunga rinna nghattu te, a bik takin, ka ngainat em em, club CEO Oliver Mintzlaff chungah lawmthu ka sawi a ni," a ti.

Paris Saint-Germain academy chhuak Nkunku hi a contract neih sa chu 2024-a zo tur a ni a, mahse, 2026 thleng a pawtsei.

Hetihrual hian Nkunku contract-ah hian kum 2023-a a chhuah theihna dan an ziak tel niin an sawi a, khawthlang media-te tarlan danin euro maktaduai 65-a dawrtu an awm chuan 2023-ah hian a chhuak thei dawn.